Vawk hri leng a la reh lo, a vulhtute manganna a nasa
Vawk hri leng African Swine Fever (ASF) a la reh hlen mai lo a, hmun tam takah vawk thi an la awm reng bawk. Farkawn, Darlawn, Sakawrdai leh Champhai chhehvel khuate chu a tuar na zual niin, vawk thite hi 2000 a chuang leh tawh a, vawk vulha eizawng tam takte manganna a la reh hlei thei meuh lo.
Heti tak maia hri lengin nghawng a nei rei mai hi a pawi a, vawk vulhtute manganna pawh hi chhawk dan awm thei mawlh thin se a va tha em. Thenkhat phei chuan eizawn nan tak meuh an hmang a, an kumkhaw innghah vena ngawih ngawih engmah lova chang ta mai tur hi a pawi a, state sorkar pawh hian an dinhmun ngaihtuah that dan hi nei thei se a va tha em.
Thawhtanni thleng khan ASF vangin Mizoramah vawk 75 an thih belh leh a, 532 suat a ni bawk. Heti hian kumina ASF vanga vawk thi hi 2097 an tling tawh a, 1733 suat an ni tawh a, ASF nia rinhlelh vawk thi confirm si loh 503 a awm tawh bawk.
A hluar laia dinhmun chu lo dah tha ta ila, kumin chhung ringawta vawk thi tawh dinhmunte hi dinhmun duhawm a ni hauh lo. Ngun zawk leh uluk leh deuh zawka vawk vulhtute leh an vawk vulhte dinhmun hi kan ngaihtuah that leh a ngai khawp mai.
Vawksa duh leh vawksa atanga thil siam duh hnam leh rama awm tan hian vawk natna kan tawh fo leh reh thei miah lo hi a pawi a, dinhmun duhawm lova kan awm zel loh nan sorkar hian ruahmanna tha zawk siam zel se la, central pawisa chauh ring mai lovin, state pawisa pawh hman ngam a va hun tawh tehlul em.