MZP hruaitu ten nimin khan Mamit district-a Pukzing khua an tlawh a, tunhnaiah Mizoram sorkarin Pukzing VC ram satthlaa, a chhehvela Chakma khua – Silsuri, Hnahva, Hruiduk, Bekabeki leh Tuikuk khua Pukzing Vengthar te hnena pek a tum vanga Pukzing khua hi tlawh an nih thu an sawi.
Hnamdang hnena Pukzing ram sahthlak chungchang chu MZP hruaitute chuan VC leh YMA hruaitute an sawipui nghal a. Pukzing khawtlang hruaitute chuan an khaw ram sahthlak an phalloh thu leh a tawp thlenga an do tur thute, No objection pawh an sign loh tur thute sawiin, sorkarin a pe lui a nih chuan thisen chhuah hial pawh an hreh dawn lo niin an sawi.
MZP hruaitute pawh a ṭul anga thawhpui turin Pukzing VC te chuan an lo sawm nghal a. MZP hruaitute leh Pukzing khawtlang hruaitute chuan Tuikuk leh chakma khuate tana VC thar siam a nih avanga Pukzing ram sahthlak a nih loh na tura a ṭul anga hmalak ho zel an tum thu MZP thuchhuahin a tarlang a ni.
MZP chuan “Kan ram, kan hnam a him theih nana theihtawp chhuaha hma kan lo lâk tawh chu kan chhunzawm zel dawn a. Hnamdang lakah kan ram kan chan zel loh nan leh kan ram a him zel theih nan hnamdangte ram sahthlak sak lo turin thuneitute kan ngen” an ti bawk.