India-a court sang ber chuan cricketer atanga politician-a inlet ta, Navjot Singh Sidhu chu kawngpuia mi a sawisak avangin kum khat lung in tang turin a hrem.
Supreme Court-in Sidhu laka hremna a lek hi kum 1988 daih tawha thil thleng kha niin kum 65 mi, Gurnam Singh-a a thih phah a ni.
MP lo ni tawh thin, kum 2018-a thil thleng, mi sawisakna thubuai dangah erawh thiam chantir a ni.
Politics-a vanglai hmang tan mek, Sidhu-a tan chuan lung in tan hi a kal zelna tur tikhawlhkhamtu lian tak a ni thei dawn a ni.
Tun hnai lawka Punjab-a assembly inthlanah an chet chhiat em avangin Punjab-a Congress party chief nihna a kalsan.
Tuna a chungthu an remnaah hi khin let lehna tur a nei chau tawh hle a, curative petition an tih hmang chauhvin a khing let thei tawh a ni.
Sidhu-a thubuai kum 1988-a mi kha niin Patiala-a an inhnial hrepa kut a thlak hnuah putar kum 65 mi hi a thi.
Hetih hun lai hian cricket-ah India tan opening batsman a nih lai niin international cricket-a a lar tan chhoh lai a ni.
He thubuai hi trial court-ah ngaihtuah niin kum 1999 khan thiam chantir a ni.
State sorkarin thiam chantirna hi high court-ah a khing leh a, kum 2006 khan thiam loh chantir a ni ta a. Hetih lau hian Amritsar bialtu MP a ni mek a, danin dan bawhchhiaa thiam loh changte chu mipui ai an awh thei lo tih thu a neih avangin a bân phah.
Thiam loh an chantirna hi Supreme Court-ah ngaihtuah tha tura ti lehin hrem a nihna pawh tihkawtlai a ni a, hei vang hian a bial ngaiah bye-election-ah a tling leh.
Kum 2018 khan court sang ber chuan mi sawisak thubuaiah thiam a chantir leh a; mahse, a mi sawisak nia sawi a tihnat avangin Rs. 1,000 chawi tura tih a ni.
A tuartu chhungkuate hian ngaihtuah tha tura ti lehin Ningani khan thutlukna siamin thiam loh changin lung ina kum khat chhung tang turin Supreme Court chuan a ti leh ta a ni.
Tu nge Sidhu?
Sidhu-a hi India-a Test cricketer hlawhtling ber zinga mi niin a khelh dan style leh a vuak nat avanga hriat hlawh a ni a, ball vawm chak chi hmachhawn a thiam vanga fak a hlawh rualin vawm vir chite a hmachhawn thiam loh avanga hriat hlawh a ni bawk.
Test-ah vawi 51 khelin runs 3,202 a siam a, a khelh apianga runs 42 siam ziah ang a ni a. ODI-ah vawi 136 khelin runs 4,413 a siam hman bawk a. Kum 1999-ah cricket a chawlhsan a, kum li hnuah BJP zawmin MP a ni a. Hun reilo te chhungin party hruaitu hriat hlawh leh an star campaigner a ni hman a ni.
A hnuah cricket commentator hriat hlawh a ni zui leh a, nuihzatthlak lannaah TV-ah a inlan a. A fiamthu thiamna leh a tawngkam danglam tak avangin commentator-a a tang pawh lawm a hlawh.
Kum 2014 inthlanpuia BJP-in chiang taka hnehna an chan hnuah sorkarin chanvo pawimawh an pek loh avangin a lungawi lo.
BJP hi kum 2016 khan chhuahsanin Congress a zawm zui a, Punjab-ah chuan an party chief hial ni phakin a awm zui leh a ni.