Vaimim ei chhetu pangang chi khat, Fall Army Worm (FAW) chu Mizoram hmun hrang hrangah a puang leh mek a, agriculture department-in an chhinchhiah chinah FAW hian khaw 89-a lo neitute vaimim chinte a bei tawh.
FAW hi kum 2019 khan Mizoramah a puang vak a, Mizoram hmun hrang hranga lo neitute vaimim chin a ei chhe nasa hle a, 2020 leh 2021-ah te pawh inlar leh mah se a nasa lo a, kuminah erawh FAW hi rawn inlar leh nasa zualin, lo neitute a tibuai leh mek.
Agriculture department hotuten The Zozam Times an hrilh danin, kumina FAW inlar lehna hmasa, Mamit district chhunga khaw 29-a lo neitute vaimim chin a suat tawh a, pangang inlarna hi ram hectare 93.6-a zau a ni.
Pangang inlar tam zualna, Lunglei district chhunga ram hectare 287-a zauah pangang hi hmuh a ni tawh a, khaw 22-a lo neitute chu a tibuai mek.
Kolasib district chhunga khaw 16-a ram hectare 69.7-a zaua vaimim chinte chu pangang hian a tibuai tawh a. Aizawl district chhung khaw 15-a ram hectare 38.4 huam chhungah inlar tawh bawk a, Lawngtlai district chhungah chuan khaw pakhat luhchilhin a inlarna hi ram hectare hniha zau a ni.
FAW hian Saitual district chhunga khaw pathuma lo neitu chhungkaw 126-te vaimim chin a suat tawh bawk a, Champhai district chhungah chuan khaw pathumah inlarin chhungkaw paruk lo/huana vaimim chin a bei tawh bawk a ni.
Agriculture department hotute chuan Serchhip leh Hnahthial district chhungah chuan pangang hi inlar mah se buaipui tham tak a la ni lo tih sawiin, Khawzawl leh Siaha district atangin pangang inlar thu report an la dawn loh thu an sawi bawk.