Mizoram chhung hmun hrang hrangah kawngpui sial leh laih zau hna thawktuten lei an laihna vung an sawngbawl mumal loh avangin kawnglaihna chhehvela chengten harsatna an tawh phah mek a, Serchhip leh Keitum inkar laih zauh hna thawh meka leivung paih pawhin Serchhip khawpui tui lakna Tuikum lui a tihnut phah hle.
Serchhip atanga The Zozam Times thudawn danin National Highway 54, Serchhip leh Keitum inkar laih zauh hna thawktute laivung paih avangin Tuikum lui chu a nut phah hle a, ruahtui a tlak phei chuan tui nut dan tehna, Nephelometric Turbidity Unit (NTU) 500 chung lam a ni thuai thin.
PHE department hotuten an sawi danin NTU tehnaah hian 5 NTU hnuai lam chu tui thianghlim niin, tun hnaia Tuikum lui nut lai berin NTU 828 laite a tling pha a, tun hnaiah he lui tui hi a thianghlim lo hle.
Serchhip-a PHE hotute chuan leivung avangin Serchhip khawpui tui lakna Tuikum lui chu a nu hle mah se mipui tana tui sem tur chungchangah erawh harsatna lutuk a awm rih lo niin an sawi.
Keitum leh Serchhip inkar leivung paih hian Zawlpui zaua leilet neitute pawh harsatna a lo thlen tawh thin a. May 5, 2022 khan Zawlpui Field Management Committee leh kawng sial hna thawktu, Kram Company hnuaia contractor, David’s Construction neitute chu Serchhip Police Station-ah an lo inbe tawh a ni.
Thudawn danin Zawlpui zaua leilet neitute hian tun dinhmunah tui nu tih loh chu harsatna lutuk an la tawk rih lo a, an tui lakna leh a fintu kawrte hnar eng emaw zatah leivung paih a awm nual avangin furpui ruah tam zawk tlak hnuah eng ang harsatna nge thleng dawn tih erawh an la sawi thei rih lo a ni.
Mamit district chhung, Darlak leh Tuidam inkara National Highway (NH) 54 ‘A’ kawng laihna leivung tawlhin Darlak zaua tuikhuah, leilet, play ground leh chenna in te lo tichhe nual tawh bawk a, hei avang hian chhiatna tawktuten contractor-te chu hnathawk thei loin an lo dang hial tawh a ni.