Siaha District Development Vigilance Committee (SDDVC) chuan Siaha Bawrhsap Bungalow building sak mek chungchangah sorkar an dem thu leh an lungawi loh thu an sawi.
SDDVC hi sorkarin Siaha district chhunga hmasawnna hna a thawh viltu an ni a. Nimin khan Bawrhsap Bungalow building, NEDP sum Rs. nuai 93 senga sak mek tlawhin a sakna hmanrua an hman leh a san danah lungawi thlak mah se, a building a têin chhungkaw pangngai tak tan luah ngaihna a awm lo tih an sawi.
“DC Bungalow building hi 34×34 sq ft-a lian a ni a, Zopa chhiara chhawng hnih niin, he building hi a têin a chhungah pindan a tam hle a. Chhungkuaa luah atan phei chuan luah rual a ni lo, an leng lo ang,” an ti.
SDDVC hian district pakhat Collector luah tur sak dan chu mak an tih thu an sawi a. Plan leh estimate siamtute leh a lo pawmtu lam an dem tih sawiin, “He ti tiat lek in district collector/deputy commissioner luah atan sak a ni mai hi satahchhuak pek ang chauh a ni,” an ti.