Kum 2019 a hmeichhe final lut Bungkawn in kuminah harsatna tawk lovin final an lut leh a. Nilaini zanah Kanan lakah 3-1 in hnehna an chang.
Tun tumah league khelh thumah hnehna chang vekin team pali inel zinga sang ber ni chungin final an lut nawn a, an khelh chinah set hnih chiah an hloh.
Championship hnuhnung ber 2019 khan league-a chak vek chungin final an khel tawh a, rin hlawh viau mah se Durtlang lakah set thum set hnihin an tlawm.
F Lalparmawii’n a chet ṭhat chhunzawmin a vawi thum nan D3 Business Player of the Night lawmman a dawng a, kum thum kal taa an chet sual tawhna siam ṭha turin May 26-ah final an khel ang.
Kanan in chak mamawh hle mahse set khat bak an thawk chhuak zo lo va, an khelh hnuhnun vawi hnihah tlawm zawnin final an beiseina a tlahniam.
An khelh hmasak berah set thum faiin champion lai Durtlang an hneh nghal a, a hnuah set khat mah la lovin Bethlehem Vengthlang lakah an tlawm a, league vawi thum khel kim tawhin set li an lak laiin set ruk an hloh.
An elpui Bethlehem Vengthlangin karleh Thawhtanni zanah league khar nan tla fel tawh Durtlang an khelhpui dawn a, set la lova an tlawm a nih chauhin Kanan in final luh inbeiseina an la nei.