- F. Vanlalrochana
(He thawnthu hi 2012-a ka ziah tawh kha a ni a. kan Mizo literature thang zelah hian, Chanchinbu lamah Thawnthu Tawi hian hmun a chang zim em em mai a. Kan hotuten hemi huangah hi chuan, ka duh duh ka ziah an phal bawk a. Ngaihtuahna tihahdamah vawiin chu thawnthu ka han hrilh teh ang che u. A khat tawkin thawnthu kan inhrilh zeuh zeuh turah ngai ang.)
Zan khat chu tihtur hi a awm lo khawp mai a. Current a awm bawk si lo. Current awm se chu facebook ila, tihtur awmloh zan pawn hun hi a khawh ral ve theih viau thin a. Facebook pawh a theih chuang lo a. Bathlarah ka thu a. Ka Nupui chu a rawn chhuak ve a, thingpui mi rawn pe a. Ka bulah a thu a, ka darah a lu a nghat a. “Thawnthu min hrilh rawh, i ziah thin ang kha” a ti a. “Ka peih dawn mawn le, bakah sawi mai tur ka van hre lo” ka tih chuan, “Awih awm loh, HMANGAIHNA ZUNZAM-ah pawh thawnthu sawmhnih pahnih i dah a, a bu hialin a chhuak a. A hnuah pawh i ziak leh teuh tawh. Hmeichhe dang hmelthat zia thute, i duh thin ziate chhiar reng hi ka tan nuamin i ring em ni? Min han hrilh teh” a ti bur mai a. ka nui a. “Nui suh, tihtur pawh a awm chuan loh hi” a ti a. “A nih chuan ka hmelhriat nupa chanchin ka hrilh ang che aw” ka ti a. Ka dara a lu a nghahna ata chua lo hawi chhuak a, mi en a, a bu nghauh a.
Kum hnih lai chu an innei ve ta a. Pasal zawk chu thu leh hlaah a tui em em a, thute hi a ziak ve fo a, Thawnthu tawi te a ziak a, hla hril te a phuah ve thin a. chanchinbua chhuah turtein a pe thin a. Chanchinbu thenkhat chuan an lo tih chhuah sak ve thin a.Internet-ah te pawh mi chhiar theih turin a pho chhuak ve fo a. Chhiar a hlawh em em ngai lem lo a. Vanglaini-ah te, Sabereka Khuangkaihah te ngei pawh hian a ziak ve thin a. Mi hriat phei chu a hlawh chuang lo a. Thalak lamah hian a tui em em bawk a. Inneih thlate pawh hi a la ve fo a. Thlalak thiam tak tia han sawi tur erawh a ni chiah lo mai thei e. An nu chu a hmeltha veng a. A thin erawh chu a chhe reuh khawp thung. Pasal chu a hau leh hrep mai thin a. Pasal chu pa fel tak a ni a, ngawi reng hian a dawh mai thin a.
Tuk khat pawh Nupui chuan pasal chu cho deuh hian a be leh khar khar a.
Nupui: “Ka thiante inneih thla chu engvangin nge i lak theih loh ang? Thalak man pawh ka pe ang a ti vek a lawm.”
Pasal: “Khami ni khan ka hman dawn lo a.”
Nupui: “Humph!”
Pasal: “Huh?”
Nupui: “Hman lo, hman lo? Khang thawnthu laktlak loh deuh deuh kha ziak ve dum lo la, eng i ang chuang lo, chuan hun i nei thei reng mai a”
Pasal: “Ka….Engtikah emaw chuan miten ka thuziak an la hlut ve khawp ang”
Nupui: “Humph! A ho em mai, laksak la a ni mai!”
Pasal: “Ka hman lo a lawm.”
Nupui: “Hemi tum chauh hi maw le?”
Pasal: “Khami ni khan ka hman lo a.”
An intir hlawh tling thei ta lo a. Na deuh hian a tawngkhum: “Ni thum hun ka pe ang che, i ‘aw’ ngei tur a ni, nih loh chuan pawi viau ang”
NIKHATNA: Choka, bualin, Computer, fridge, engmah a hman a phal ve lo a. Khuma a mut chu a phal sak tawk a. Pawisa hman tur a la ak nual a, pawi a ti lem lo a.
NIHNIHNA: A pawisa ah lai pawh a chhuh vek a, i thiante puihna i dil vaih chuan i tuar ang, a la ti zui a. Hmeichhe nasa tak chu ava ni em. Pasal pawh chu a mangang ve ta a, nupui hriatthiamna chu a dil a, a nupuiin a hremna chu a tihtawp a ring a. Nupui chuan engah mah a ngai lo a. A thiannute inneiha thlalak a intiam hma chu in phah hnuai a tumlo reng reng a.
ZAN THUMNA: Zan thumna zanah chuan, khumah an han mu a. pasal chuan khum pang lehlam a hawi a, nupui chuan khum pang leh lam a hawi a. An inhnung chhawn a nih chu.
Pasal: “Kan titi dun a ngai”
Nupui: “Inneih chung chang kha a nih loh chuan theih nghilh rawh”
Pasal: “Thil pawimawh deuh mai a nia.”
Nupui chuan engmah a sawi zui lo a.
Pasal:”Inthen ka duh a ni”
Nupui chuan a thil hriat chu awih har a ti kher mai.
Pasal: “Duh deuh mai ka nei a”
Nupui chu a thinrim khawp mai a, ben chawrh mai hi a duh a. Mahse, a insum hram hram a, sawi zawh tir phawt a duh ta a. A mittui chu a parawl tan tawh a. A kawr atang pasal chuan thlalak hi a phawrh a. A Kamis hnuaia a kawr hak ipte a tang a ni a, chu chu nimina a zen loh awm chhun a ni. a lo van fimkhur lo em.
Pasal: “Hmeichhe duh awm tak a ni”
Nupui chu a mittui a tla ta a
Pasal: “Ani chu a mizia a duhawmin a changkang hle bawk.”
Nupui thinlung chu chhun ang ngawt ngawtin a na a, Pasal chuan a awmzawnah hmeichhe dang thlalak a dah hnai te chu hmuh hrehawm a ti kher mai.
Pasal: “Kan inneih hnu chuan ka thuziak leh thu leh hla lama ka inhmanaah theihtawpin min tanpui ang tih a intiam a ni”
Nupui chuan a thik kher mai, hmanah khan chutiang thu chu a lo sawi daih tawh a ni.
Pasal: “Min hmangaih em em a ni.”
Thawhlawka, “Keipawhin ka hmangaih lo che em ni?” tih nghek mai chu a chak a.
Pasal chuan a sawi zawm zel a: “Ani chuan ka tih duh loh ti turin min nawr luih ka ring lo a ni”
Nupui chu a ngawi vang vang a, a inngaihtuah a, mahse, a thin ur sosang chu a la reh chuang lo. Pasal: “A thla hi ka laksak a ni a, i hmu duh em?”
Nupui: “…!”
Thlalak chu Pasal chuan nupui hmai zawnah chuan a han lek kang a. Nupui thinrim lutuk chuan pasal kut chu a vai sawn a, na zet mai hian Pasal biangah chuan a beng a.
Pasal chu a thawhawk a. Nupui chu a tap a.
Pasal chuan thlalak chu a ipteah chuan a dah leh a. Nupui chu rizai chuan a inlukhup a.
Pasal chuan eng chu a hmet mit a, a muhil ta a. Nupui chuan a hmet eng leh a, a tho a. Pasal chu a muhil a. Nupui mutchhuak chu a reh vek a. Khatianga a pasal a lo ti kha a inchhir ta hle bawk a.
Nupui chu a tap leh a, thil tam tak a ngaihtuah a. Pasal chu a kaitho chak hle a. Uluk taka thil sawi dun pui chu a duh a ni. A nawr lui duh tawh lo a ni. Pasal awm chu a en a, hmeichhe hmel landan chu a hmu chak a ni.
Nupui chuan thlalak chu a pawt chhuak a. a tah a chhuak a, nuih te pawh chu a chak lawi bawk si a.
Thlalak chu a nalh khawp mai a, Nupui chuan ama thla chu a zu hmu a. A kun hniam a, pasal biangah chuan a fawp a.
Pasal chu a nui a, a muhil der lek hi a lo ni a”
Ka nupui chuan, “A van ngaihnawm em em, tute nge niang aw?” a ti a. “I hre mai thei ni, ka sawi lo ang” ka ti a. Ka nupui chuan, “ Thu pakhat min ti hre chhuak” “Enge i hriat chhuah” “You learn to love, not by finding a perfect person, but by learning to see an imperfect person perfectly.. Mizo tawngin engtin kan dan ang” “A va har duh awm ve, ‘Hmangaihna chu mi famkim tawnah a in nghat lo a, mi famkim lo hmuhfamkimnaah a in nghat a ni.’ a kawk ve thoin i hria em?” “Kawk ve e, i thiam a lawm..” Ka nupui chu a nui a. A biangah ka piai sak a, “Lut ang, a vawt tan.”