Education Minister Lalchhandama Ralte chuan sorkarin zirna in hma a sawn nana hma a laknain rah tha a chhuah a, sorkar sikulah lut duh an put thu leh hmun thenkhatah phei chuan an dawhkante siam belh hial a ngai tih a sawi.
Mizoram Middle School Teachers’ Association (MSTA)-in nimin khan MSTA Office, Teachers Inn, Zarkawtah Silver Jubilee lawmna an nei a, he hun hmanpuitu education minister chuan sorkar sikula lut duh an pun thu hi a chhuak.
Minister Chhantea chuan sorkarin zirna a ngai pawimawh thu sawiin, “Hri leng avanga sum lama harsatna kan tawk chung pawhin zirnain hma a sawn zel theih nan kawng hrang hrangin hma lak a ni a, thawktu pawh mi 2,000 chuang lak an ni tawh nghe nghe,” a ti.
Hri leng karah pawh zirna kawnga hma an lak theih nan zirtirtuten anmahni sum pawh seng hreh lovin kawng hrang hrangin hma an la thin chu lawmawm a tih thu sawiin, zirnain hma a sawn zel theih nan hma an lak zelnaah pawh MSTA-te chu thurawnte pea finchhuah zel turin thawhpuiah a sawm a ni.
He hun hi MSTA President Rosangzuala Ralte-in a kaihruai a, Education Director Dr.H.Lalthlangliana’n thu sawiin, pawl dinhmun leh hmalakna report ngaihthlak a ni a. MSTA-ah hian member 1,376 an awm a ni.