AZL: Congress thalai chuan Mizoram chhunga thlai tharte hralhnain ngaihsak a hlawh tawk loh avangin MNF sorkar hnuaiah kuthnathawktu tang tak takte pawh an tang hlei thei tawh lo tih an sawi.
An thuchhuahah MPYCC hian tun hnaiah Myanmar leh Mizoram state pawn atanga ram dang thar chhuah dawnfawh chawk luh a nasat avangin Mizoram chhung ngeia thar chhuahte hralhna a hnawng mek tih a sawi a. Dawnfawh thar hnem Lamzawl khua, Saitual district phei chuan tun dinhmunah pum 6,000 chuang an tihchhiat tawh thu an sawi.
Tun sorkarah ram dang atanga dan loa kuhva lak luh a nasat avangin Mizoram chhunga kuhva chingtute ngei pawhin harsatna an tawh tih tih an sawi a. Hnahlan leh a chhehvela grape chingtuten grape thahnem tak thar mah se a hralh leh thawh chhuah lamah harsatna nasa tak an tawk bawk tih sawiin, “Thingtlanga kuthnathawktute intodelh turin nasa takin tang mah se, MNF sorkar hian hlawhtlin tuma tang mekte pawh tanpui thei loa an awm hi a pawi kan ti takzet. Kuthnathawktu tang tak takte pawh an tang hlei thei lo a ni ta ber,” an ti.
“Kan ram chhung thlai tharte heti taka a hralhna ngaihsak hlawh a ni lo ta zel mai hi thil vanduaithlak tak a ni,” tiin, Covid-19 hluar laia Serchhip leh Mizoram hmun hrang hranga kuthnathawktute thlai thar hralhna a awm mumal loh avanga manganna te ngaihtuahin, kan sorkar hrawn mek hian kuthnathawktu khawsak harsa zawk, thawkrimte a tanpui lo hi a pawi an tih thu an sawi bawk.