Islamic State tluchhe ta tawrhpuitu chuan United States president hlui, George W Bush-a thah tumin ruahmanna a siam a; mahse, FBI-in an hre chhuak hman hlauh niin US thuneitute chuan an sawi.
Bush-a thah tuma ruahmanna siamtua puh hi Ohio-a mi niin Iraqi a ni a, Mexico atanga US-a chet lak tum a ni.
Tunah chuan thuneitute kutah a awm tawh a, Thawhlehni khan Ohio-a federal court-ah a inlan.
FBI hian a ruka an hnena thil hrilh ru thinte leh electronic surveillance hmangin a ruahmanna siam hi an hai chhuak a ni.
Court lehkhaa lan dan chuan kum 52 mi, Shihab Ahmed Shihab-a hi Iraqi niin kum 2020 atang khan 2020-ah hian a awm tawh a, inhumhimna a dil mek tihkhawtlai niin nghak mek lai a ni.
FBI chuan a rukin US-ah hian a lut a, Arabic tawnga Al-Raed an tih pawlah a tel niin an sawi a. An pawl hi ‘khawpui’ tihna a ni a, Qatar-a hmunpui nei an ni.
FBI thu dawnna atang chuan Shihab-a hian Bush-a chu ‘Iraqi tam tak thihna thlentu’ a nih avang leh ‘Iraq a thendarh’ avangin thah ngei a duh a ni.
Hma a laknaah hian amaha chet a tum a, ‘a lo thi a nih pawhin pawi a ti lo ve, hetiang beihpuia a tel tur chu a inchhuang hle zawk dawn’ niin sawi a ni.
Shihab-a hian police badge lem pawh neiin Mexican ramri kâna beihpui thlak tura a luh theih dan tur leh a chhuah leh theih dan turte pawh heng badge hmang hian a thlithlai reng a ni.
US-ah hian mi pahnih, Iraqi intelligence agent thin a luhtir theih a beisei a, anni hi mi thahna lama hnuhma ngah tawh tak an ni.
Shihab-a hian FBI lam mi, a ruka amah enthlatu hnenah pawh Islamic State member-te chu US-a lak luh a tum niin a hrilh bawk.
A thuihhruai pakhat nen Dallas, Texas-ah kalin Bush-a chenna leh George W. Bush Institute pawh an lo thlithlai tawh bawk.
March, 2022 khan a thuihhruaite nen Columbus, Ohio khualbik pindan pakhatah hma an lak dan sawihovin ralthuamte pawh an en a, dan kengkawhtute uniform lem neih dante pawh an dap.
Man chhuah a nih takah hian dan lova US-a mi a luhtir avangin kum 10 tang thei a ni a, US mi pawimawh ni thin thah a tum avangin kum 20 dang tang thei a ni bawk.
Bush-a thupuangtu chuan Shihab-a man chhuah a nih chungchangah president hlui hian US Secret Service leh dan leh thupek kengkawhtu te, hnuchhui mite a rintawk thu leh him tawka a inngaih thu a sawi tih a sawi.