Tuichangral in an tum ram an thleng zo lova, team tha leh inkhairual Durtlang North hmaah a tlo lo zawk a tangin Zothan Autoworks Pro Volleyball League semifinal-ah an tlawm a. TNT leh Durtlang North ten final an khel dawn.
Nilaini zana semi-final inkhelah R Dengthuama Indoor Stadium-ah Durtlang North-in thawh ho na tha hmangin hnehna an chang a. League a an tlawm tawhna duhthusam in an chhanglet.
Lalbiakmuana’n a theihna lantirin championship kal meka a khelh that berah point 11 hmuin vawi khat chiah a tisual a, Durtlang North tanpuiin a zawnin final an lut.
Pro Volleyball hnuhnung ber 2019 final-ah rin hlawh zawk ni chungin Chhinga Veng Spikers lakah an tlawm a, Zirtawpni zanah erawh chesual lova an record siamthat nan league-a an hneh tawh TNT nen trophy an inchuh ang.
Star player aiah teamwork
Kar hmasa Thawhlehni zanah team pahnihte hi league-ah an intawng a, Tuichangral in set khatna an hloh hnuah set thum la zawnin an chak.
Tun tumah pawh Durtlang North in bul an tan tha leh a, Vanlalmawia’n team chawi kangin set hmasa ber an la. An inkhel hmasa zawk ang bawkin Tuichangral in nawr letin filawr takin Sahil Kumar a inlar a, awlsam takin set hnihna an la ve leh.
Set thumnaah erawh thil a danglam. Durtlang North-in inkhairual leh inpumkhat takin an khel a, set hnihna thlenga talbuai Sagar Malik chuan ngaiawh chhovin tute pawhin an chanpual hlenin point an hlawh chhuak thei vek a, phur leh inringtawk takin an khel.
Tuichangral innghahna Sahil a zuang tamin a vaw hnem hle a, a tir set hniha a inlan dan pha lovin a tlahniam. Amah thlawp thei ber Saidingpuia’n team a fuih phur zo bik lo va, thawh hona tha tak nena khel Durtlang North-in set thumna atangin inkhel an awpbet tluan a, lehlam an zuih ral ve thung.
Hnehna an chan theih nan Durtlang North player-te an tangkai dan a inchen tlang hle a, Biakmuana bakah Mawia’n vawi 12 vaw tlain point thum a hloh a, Vanlaltanpuia’n point 10 hmuin tum hnih a tisual a, Sagar chuan point 10 a paih laiin 18 a hlawh bakah Fabian Lallunghnema’n point sarih hmuin point thum a hloh.
Tuichangralin team pum pui leh mi malin a hma an phak lo viau a, Sahil chuan Durtlang North an hneh tumin point 50 hmuin 15 a hloh a, tun tumah 35 hmuin 14 a paih. D3 Business Player of the Night a thlan a ni.