Mizoram a multi-brand mega showroom hmasa ber Jack’n Jill Shopping Mall chu Nilaini khan Ramhlun North Industry Mual-ah an hawng.
Jack’n Jill Shopping Mall hi ‘lifestyle product’ tha chi kim taka zawrhna hmun a ni a. Fashion brand chi hrang hrang phochhuahna niin Mizo mipuiten kan hmuh phak a la awm ngai lo bazarna hmunpui thar a ni.
Eng nge Jack’n Jill?
Kum 1984 khan Dimapur, Nagaland-ah Jack’b Jill shopping mall hmasa ber hi a ding a. Mipuite tana khawvela brand tha hrang hrang awlsam taka an ban phaka a awm mai theihna tura duan a ni.
Kumtin thang zelin an inzauh zel a, kum 2016 khan Kohima-ah mall thar an hawng a. Tuna Aizawl a hawn thar hi kum 2019 khan a neitute hian hma an la tan tawh.
Hripui karah kum 2020 khan Jack’n Jill Mini a bul tan phawt niin tunah shopping mall puitling din a ni ta.
Engtin zel?
He shopping mall hi multi-brand mega showroom a ni a, India rama ‘lifestyle product’ tha te mipui nawlpui ban phakah, man tlawm zawka lei theihin an nei a.
International brand tha leh lar te bakah India brand tha leh tharte an nei kim hle.
He mall hi ‘family store’ a nih angin naupang leh puitling mamawh incheina a kim hle a. Formal incheina atanga outdoor lam thlengin an nei chikim. Tun dinhmunah he mall-ah hian brand chi hrang hrang 100 chuang a awm a, dah belh zel a ni bawk.
Heng brand-te hi hmundang leh online a lei theihna ang thovin a lei theih a, brand tinin ‘discount offer’ an neih ang kha mall-ah hian offer a awm ve zel bawk ang.
Jack’n Jill hi Servamus building, The Salvation Army, Ramhlun North Corps Biak In bula awm a ni a. He shopping mall-ah hian thawktu mi 60 an awm mek.