Social activist Vanramchhuangi chuan NHIDCL-in Mizoram chhunga kawng an laihna leivungin environment a tichhiaah ngaiin an hnathawh lai chawlhsan tura stay order pe turin Principal Chief Conservation of Forest (PCCF) a phut.
Vanramchhuangi chuan nimin khan PCCF Jitendra Kumar chu a pisaah hmuin leivung sawngbawl dan mumal loin environment a tihchhiat zel loh nana hma tura a phutnate ziakin a pe.
A ngenna thehluhah hian NHIDCL-in hmun hrang hrang – Seling to Zokhawthar, Keifang to Manipur, Lunglei to Tlabung leh Aizawl to Tuipang inkar kawng an laih meka leivungte chu kawng thlangah an nawr liam thin tih a tar lang.
Hei hian thing leh mau chhiar sen rual loh a tichereu a, luite tam tak a chhilh bo a, luipui fintu luite atanga leivung, ruah sur vanga chirh diaka lo chang ta chu luipuiah a luang lut nasa tih leh hengte avang hian an hnathawh chawlhsan tura stay order pe turin PCCF hi a phut tih a tar lang a ni.
NHIDCL kawng laih vungin environment an tihchhiat chu siam tha tura hmalak nghal a phut thute, a hming mai maia Impact Assessment tih chu ram tan a that loh avangin agency/ institute rintlak chauh tihtir tura a ngen thu te a tar lang bawk.
PCCF chuan kawng laihna leivungin harsatna a thlen dante a lo hriatin hma a la nghal a, Mizoram Pollution Control Board-in NHIDCL-te chu show cause notice an pe tawh a, an chhanna a zirin action an la dawn tih leh an hmalaknate ngaichang turin Vanramchhuangi leh a tawiawmtute chu a hrilh.
Plastic-in Mizoram environment a tihchhiat nasat thu PCCF chuan sawi bawkin, hemi kawngah hma an lak tumnaah tawiawm turin Vanramchhuangi leh a thiante chu a lo sawm a ni.