Sorkar in a mipuite eibel benbuaksak lul suh se
Mizoram tharchhuah ngei Grape wine, zawrh tura lak tawh thahnem tak mai chu a zuartute dawrah ngei sorkar in a mansak a, engmah thuchhuah an nei zui lo. Chu mai a ni lo, inrinlawkna leh inhrilhlawkna, phal loh a nih sawi burna pawh a awm lo!
Mizoramah zu khapna kalpui tura duan Mizoram Liquor (Prohobition) Rules 2022-ah grape wine siam leh zawrh phal a ni lo chungin inhriatthiamnain siam phal erawh a ni a, hetihlai hian Excise & Narcotics department-in Aizawl khawpui chhungah grape wine dap rûnpui neiin thahnem tak an man a, sawizui a hlawh phah hle.
Sorkar in chhungkaw tam tak grape a chintir a, mahni thawhchhuah ngei ringa kan intodelh chho tan dawna a lan laia hetia a che leh mai hi a mak hle a, chhungkaw tam takin eibel berah an lo hmang hman bawk nen, hei baka chawbel inbenbuaksakna hi a awm chuang awm lo e.
Tin, kohhran thenkhatin mahni tharchhuah ngei chu ngaisangin, an dahsang a, sacrament-ah hial hmangin, a chingtute nen inremna an lo nei hman tawh nia hriat a ni bawk. Chung zawng zawng chu sorkar chuan sualah a ngai a, a man khawmsak ta si.
Dan lova kuhva ro tawlh, langsar em em lakah mit a siai thei a nih chuan, mahni tharchhuah ngei ngaisang awm zawk tak kan nih laia hetia an che ta mai hi a mak a, sorkar hian a mipuite eibel leh dinhmun ngaihtuah chungin ruahmanna siamtha leh ngei bawk teh se. Buaina nasa zawk an tawh phah ang tihte pawh hlauhawm tak a ni.