A mak tih loh rual a ni lo. India rama zaithiam lar tak Sidhu Moose Wala thihna leh a hla ‘295’ bakah ‘The Last Ride’ chuan inzawmna a nei tlat. A thih hun tur a hre lawk a ni hial lo maw, tih chu mi tam tak pawmdan a ni ta.
Punjabi zaithiam lar hi May 29, 2022 khan Mansa district, Punjab-ah kahlum a ni a, Indian Penal Code (IPC) sectin 295 chungchang a ngaihdan tarlanna hla lar ‘295’ leh a thih Ni 29/5 a in mil chiah.
He thil hi social media lamah nasa taka vawrh darh niin, comment tam takah a hla title leh a thih Ni inmil chiah mai chu mak an tih thu an sawi luai luai. Kum 28 mi thihna hian fan te mittui a sur tir nasa a, milar leh lar lo te thlengin a thih thu hian nasa takin a barakhaih.
Mak dang leh chu, a hla hnuhnung ber ‘The Last Ride’ hi a ni.. May 29 tlai hian a cousin leh a thenawm pa nena motor an khalh chhuak chu kahhlum an ni a. Rimawi khawvela rapper lar tak Tupac kahhlum a nih laia a motor chuanna thlalak a dah lehzel bawk a, Mosse Wala ang chiahin American rapper lar hi mi kut tuara thah a ni.
Moose Wala kahhlum a nih hmâ Ni chiah khan Punjab sorkar chuan mi 420 chuangzet hnena venhimna a pek tawh chu a lakir vek a, hetah hian Moose Wala pawh a tel.
Pawikhawihtute hi man an la ni lova, chanchin buatsaih lai hian rinhlelh mi eng emaw zat thu zawhfiah ni tawh mah se, hlin mai tur an la hre lo. Gang leader Lawrence Bishnoi bakah a thawhpui dang Goldy Bar te chu rinhlelh an ni mek.