India rama furpui lo thleng tur chu a sur dan thin pangngai zat a sur theih a rinaw niin Thawhlehni khan sorkar weather office chuan a tar lang a. Tun hi kum li a zawna Asia-a economy lian ber pathumna ramin fur laia ruah a dawn thin ang pangngai emaw, a aia tam emaw a dawnna tur a ni dawn ta a. Lo neihna innghat ram tan hian thar chhuahah pawh nghawng tha a neih beisei a ni.
India hian fur lo thleng turah hian ruah a dawn thin pangngai aia tam, 103% vel a dawng dawn niin India Meteorological Department (IMD) Director General Mrutyunjay Mohapatra chuan thuthar lakhawmtute hnenah a sawi.
IMD hian April thlaa an thlirlawkna siamah khan a nih dan pangngai phak lo hret, 99% vel tla turin an lo sawi lawk tawh a ni.
IMD hian a nih dan pangngai (average/normal) tih sawi nan hian kum 57 liam ta chhunga ruah sur tam zawng chawhrual, 87 cm chu a chhut nan an hmang a. June leh September chhunga 96% leh 104% inkar a tla a nih chuan a pangngai tiin an sawi thin.
“Tuna kan hmuh lawk theih chinah chuan ruah hi ram pumah, zau takin a insem darh dawn a ni,” tiin Mohapatra chuan a sawi.
India-ah hian furpui ruah hi chhim lama Kerala state-ah chuan Pathianni khan a thleng tan tawh a, a nih dan thin pangngai aiin ni hnihin a hma.
Fur ruah hi ram laili, bekang leh cotton chin tamnaah chuan a nih dan thin aia tam a tlak rin a ni.
Fur ruahtui tla tam hian buh thar a tihtam beisei a ni a, khawvela buh thawn chhuaktu tam ber ram tan hlawkna tur a nih beisei a ni a. Tun thlaa wheat thawn chhuah khap thut khan ram danga buh thawn chhuah a tihpun beisei a ni bawk.
Sorkar leh industry thuneitute chuan buh thawn chhuah khap hi chu tumna a awm lem lo niin Reuters an hrilh.
Lo atanga thil thar chhuak tam leh innghat pawh tam berna, India-ah hian fur ruahtui tlak dan hi a pawimawh hle a. Lo tam zawk hian tuikawng tha an neih loh avangin ruahtui hi an thlai chawm nana an rin ber a ni.
Lo atanga thar chhuahte hi India-in sum athawh chhuah 15% tumtu a ni a, mihring tluklehdingawn 1.3 chuang cheng zinga a zahve aia tam hi lo lam hna thawk an ni.
Lova tui pek nan te, aquifer leh tuikhuaha dah atan te fur ruah hi hman nasa a ni a, khaw lum lutuk thin vawng daitu tha tak a ni bawk.