2026 FIFA World Cup chu a hnai ta hle a, no mawi hawn tur pawh an inrinsiak nasa tawh hle a. Kumin nipuia world champion thei tura rin kai zual pangate kan thlir kual ve dawn a ni.
- Portugal
Portugal hi kumin World Cup khelh turah a vawi khatna atana champion ni thei tura rin hlawh ber an ni mek.
Roberto Martinez-a naute hian tluang takin qualifying an paltlang a, player tha hmingthang tak tak a kawl hnem hle.
Kum 41 mi, Cristiano Ronaldo chuan an ram hi a vawi rukna atan World Cup-ah a ho dawn a, record thar a siam a. He inelnaa outfield (goalkeeper ni lo) player upa ber a ni bawk.
Ronaldo hi Portugal tana goal thun thei ber tura rin la ni reng mah se, an midfielder tha chungchuang tak takte avangin rin kai ber an nih theih phah thung a. Bruno Fernandes, Bernardo Silva leh Paris Saint-Germain player pahnih, Joao Neves leh Vitinha te an kawl avang hian midfield tha ber an ni a tih ngam.
- Brazil
Brazil chu South America-ah 5-na niin qualifying-ah an tluang lo hle a, harsa takin an tling hram.
Vawi nga lai champion lo ni tawh ram hian World Cup no mawi an lak hnuhnun ber atangin kum 20 a liam tawh a; mahse, Brazil hian thiamna nei tha tak tak an hrin chhuah reng avangin inelna apiangah rin kai an ni ziah thung.
Vinicius Junior leh Raphinha te chu khawvela player tha berte zinga mi niin inkhel an thlak danglam thei a, hetih lai hian Champions League-a PSG champion-puitu captain Marquinhos leh Arsenal defender Gabriel te chu tlar hnung lamah an khawng tha hle dawn.
An hriamhrei ber tur erawh an head coach Carlo Ancelotti a ni mai thei a. Hlawhtlinna hmel lo hmu hnem tawh tawh tak hian record siamin Champions League trophy vawi nga a lo la tawh a, Europe-a league lian pangaah a team-te a lo champion-pui tawh bakah manager sulhnu ropui tak nei a ni.
Mak ve deuh chu Selecao hi champion lai, Argentina aia dinhmun tha zawk luah tura rin an ni.
- England
England hian inelna lian zawka hlawhtlinna chan an châkna hi an titawp thei ang em? England-in World Cup no mawi an lak hnuhnun ber atangin kum 60 lai a tling tawh a, hei hi an ram chanchina inelna liana trophy an lak hmasak ber leh tun thlenga an lak chhun a la ni.
Three Lions hian qualifiying-ah goal khat pawh chhuah lovin awlsam takin an tlang a, tlar hma lamah Harry Kane an nei bawk a, goal thun lamah harsatna an nei vak lo turah a ngaih theih.
England hi a zawnin European Championship final-ah an tlawm tawh avangin no mawi lak an hnaih tawh hle a tih theih rualin fiahna tam tak an la hmachawn a ngai a ni.
- Spain
European champions Spain hi rin kai berte zingah an tel a. Luis de la Fuente naute hian Euro 2024-ah khan ropui takin hnehna an chang a, trophy la tawh, tawn hriat ngah player thiam tak tak an kawl a ni.
Lamine Yamal chu La Roja tana danglamna siam thei bik a rawn ni leh dawn a; mahse, tlar hmaa striker rintlak deuh an neih loh erawh an beiseina daltu a nih theih a hlauhawm hle.
- France
France hian a zawnin World Cup final vawi thum luh an tum dawn a, rin kai berte zingah hmun an luah ve a. Les Bleus hian khawvela footballer tha pawl thahnem tak neiin squad chhah tha ber leh talent nei tha ber an nei a ni ti pawhin a sawi theih ang.
Tlar hma lamah Kylian Mbappe, Michael Olise leh Ousmane Dembele te inkawp tur ringawt pawh hi lehlam pawl tlar hnung tan chuan raltitna tham a ni.
Anmahni thlawptu dangte pawh game thlak danglam thei khawpa thiam an ni hlawm a. Hetiang an nih avangin France hi dan an harsa hle ang.