Railway Minister Ashwini Vaishnaw chuan Thawhtanni khan India rama rel tlan chak chi hmasa ber tur, Surat leh Bilimora inkar, Gujarat-a tlan tur chu kum 2026-ah an peih hman ngei tur thu a sawi a, puitlin a nih theih nana kawng an zawh pawh a dik lam zel a nih thu a sawi.
Vaishnaw-a hian Surat tlawhin sorkarin Ahmedabad-Mumbai bullet train project a neih mek a endik a ni.
Ahmedabad leh Mumbai inkara rel chak chi tlan tur hian hma lakna a chak a, hna pawh a chak hle tih a sawi.
“Bullet train hmasa ber tur, Surat leh Bilimora inkar tlantir tur pawh kum 2026-ah chuan tihhlawhtlin ngei a nih kan ring a. Hmalakna a tha a, a hunah tak tlantir theih kan inring,” tiin thuthar lakhawmtute a hrilh.
Bilimora hi Gujarat chhim lam, Navsari district-a khua a ni.
Project kal mek hi Ahmedabad leh Mumbai inkara high speed rail (HSR) corridor tur pakhat a ni a. Darkar khatah km 320-a chakin km 508 leh station 12 tlawh tur a ni a. A puitlin hunah chuan khawpui pahnih inkara zin chhung hi darkar thum chuang hretah titawiin a hmaa darkar ruk thang ngai chu a titlem hle dawn a ni.
Japan International Cooperation Agency (JICA) chuan hna thawhna 81% tumin a hna pum hi Rs. Vaibelchhe nuai 1.1 senna tur a ni.
Vaishnaw chuan bullet train project-ah hian km 61 vel a kawng peih tawh niin km 150 vel tur chu hma lak mek a nih tih a sawi.
“Prime Minister Narendra Modi-a hmathlir niin tun lai zawk leh service pawh tha zawk, station thuam thar, Vande Bharat rel thar, Kavach (automatic train protection system), bullet train te pawh a tel a. Indian vaibelchhe 130 tan kan bei mek a ni,” a ti.
Vaishnaw hian Surat bula Vaktana khuaa Mumbai-Ahmedabad High Speed Rail Corridor siam mek te, Antroli railway station siam mekte a en a ni.
Nasilpore, Navsari-ah hna thawh mek pawh Minister of State for Railways Darshana Jardosh Jardosh nen an en bawk.
Maharashtra-a rel chak chi tlantir tumna chungchang chu railways minister hian a kawng kalna tur ram chungchanga harsatna a awm avangin hna a chak thei lo niin a sawi a. Maharashtra chu he thil puitlin theih nana thawhpui tha an nih a ngai niin a sawi.
“He thil hi national project a ni a, politics chunga mi daih a ni,” a ti.
“Tuna project kal mek hi entirna a ni a, Maharashtra chin hi a muang a, a kaltluan thuai erawh kan beisei,” a ti.
Hetih rual hian Gujarat huam china km 352 kal tur chu a thui tawk hle a, Maharashtra lama ram tihfel a nih hma chuan helamah hian an insawrbing niin a sawi bawk.