- Mahmuaka Chhakchhuak
Mizoram chhungah June 11 – 19, 2022 chhung ringawtah khan hmun 72-ah ruahsur avanga chhiatna a thlen thu kan hria hi a pawi hle mai a, heng zingah hian chenna in chhia 23 lai a awm bawk a ni. June 21, 2022-a chhuak Vanglainiah chuan hetianga Mizoram chhunga chhiatna thlengah hian hmun 60 lai chu leimin (landslide) vanga chhiatna thleng niin leimin mai bakah tuilian, lungtla leh lungrem chim avang tein chhiatna hi thleng niin a rawn tarlang a. Heng zawng zawngte hi vanduai hrim hrim vanga thleng a awm theih rualin keimahni zir loh vanga thleng a awm thei bawkin a rinawm.
Kum 2021-ah khan heti hian Serchhip atanga Lunglei thlenga kan kal naah nilenga ka thinrim thu ka lo ziak tawh a ‘Kan pi leh pute hunlai atang tawha thingtlang lo neih kan chhawm a, kumtina lo ka vat a, kan hal a, a kum leha hmun dang kan vat leh ta zel thin hi ka sawisel hauh lo nain vawiin ang hun thlenga lo vah loh kang duai duai thin erawh hi chu lawm taka pai daih mai harsa ka ti tlat thung si a. Kum 20 kal tawha Serchhip leh Keitum inkar kawngkama thing buk tha tak tak awm thinte kha hmuh tur a vang tawh hle mai a, a piah lawka ram ngaw tha pui puite ngei pawh alo chereu zo ta bawk a, sava hram hriattur a awm tawh ngai lo bawkte chuan ka thin a ti rim zual a, a khawharthlak ngawih ngawih a ni. Ni asa em em a, thlantui a luang zawih zawih reng a, kawngkam thinghlim chawlh chakawm tak tak tur a awm ta lo hi a huatthlalaawm hle a, hetiang zawnga kan kal zel a nih phei chuan Zoram hian Thlaler ram nun hi kan tawng chho zel ang a, kum rei loteah hian He ram hi Thlaler ramah kan la chantir lo ang tih pawh a sawi theih loh a nih hi’.
Serchhip leh Lunglei inkara heti taka kawngkam thinghlim awm ta lo te, helai chauh niloa Seling leh Champhai inkar kawngahte ngei pawh kawngkam thinghlim tlem tawh ziate hi han ngaihtuah chiang ila thin a rim teuh mai. Hetiang thing leh mau kan kih chereu tak avang hian leimin leh vanduaina dangte hi thleng thei a ni tih kan hre lo a ni lo a, hrereng chungin kan ti lui ve bawk thin si hi a pawi a ni. Tun ni reilote chhunga heti taka leimin vanga chhiatna thleng a tam ta mai hi vanduai vang chu a ni tehmeuh nain keimahni thiam loh vang a ni ve bawk tih hriaa tupawh maiin thing leh mau kan neih sate duat mai bakah thingphun uar phahna atan hmang thei ila a va duhawm dawn em. Vanduaina hi sawi lawk theih ni chiah lo mahsela keimahni zir loh avanga thleng hi a awm ve theih bawk avang hian lu chunga meiling chhek khawl an sawi ang maia kan la tawng buak tur lam ngaihtuah duh loa heti taka kan tal mai mai hi chuan nakin lawkah hei aia vanduaina nasa zawk hi kan la tawng lo ang tih pawh sawi har tak a ni.
Mizote hi harh vang tha tak kan niin kuthlei tak kan ni bawk a. Kawngkama laiking nilum ai lai pawh vawm mai mai duh mi kan nih tlat thin avang hian kan ram chhunga thing leh maute ngei pawh hi kan kuthlei avanga kan tihchereu hi a tam ta hle bawk awm e. Thlawhhma atana thing tam tak kan kih a, kan hal a, kum khat hnua kan rauh san leh mai mai avangte hian kan ram hi thlawhbuaah kan chan zo ta bawk a nih hi. Thlawhhma atana lo kan vah a, kan hal lahin kan vah bak kan ti kang duai duai thin bawkte nen hian kan ram chhungah ram ngaw tha a awm ta meuh lo a, nungcha leh sava chi hrang hrangte tana chenna tur ngei pawh kan tihchereu sak ta zel bawk si a. Kawlhawk hram ri te, Vahui hram ri kur kurh rite ngei pawh nang leh kei hian kum engzat tak nge kan hriat tak loh le?
Thenzawl leh Kanghmun inkarah niin ka hria, kawngkamah sunhlu kung tha deuh mai a awm thin a, hmannia ka han hmuh leh chuan a zar zawng zawng kan lo bal zo vek tawh a, zar pawh nei tawh loin alo ding ta hial mai chu ka khawngaih lutuk avangin ka mittui a tla teuh hle mai. A va han pawi em aw ka ti ringawt a, heti tak hian a ni maw mizote hi kan kut alo hlei a, kan lo huamhap tak mai le ka ti hial. Kawngkam maia awm a ni a, kan ei duh a nih pawhin vawm thla mai ila, a tla chhar a hrehawm chuang dawn der si lo a tihte ka ngaihtuah zui a, a zar kan han bal kher thin hi a tullo hle a ni. Hetiang hi i sim tawh ang u. I bansan tawh ila, kan ram chhunga thing leh maute hi kan mamawh bak chu i zuah hram hram ila, rah chhuah chi phei chu i duat lehzual ang u.
Tunlaiin kan ram chhungah hmasawnna atana pawimawh tak kawngpui chei that mek a niin hmun tam takah a thara sialte pawh a awm bawk a. Nimahsela heng kawngpui tha zawk kan neihna atan ngei pawh hian kan kutthlaknain hmun tam takah ram leilung a tihchhiat zawk tlat avang hian kan ramah leimin leh tuilian hi thleng fo pawh nisela a mawh lo e. Tlabung lamah phei chuan a hmun loa leivung paih avanga tuilian an tawrh thute kan hre bawk a, a pawi hle a ni. Midang ngaihsakna telloa mahni hmakhua ringawt kan thlir chuan he ram hi ram nuam a ni ngai lo ang a, mihring chauh niloin he ram hi nungchate tan phei chuan chenna tlak loh a ni thuai ngei ang. Naupang tlangnel ngam lohna inchhungte ngei pawh hi hrehawm ru deuh a ni a, chutiang bawka nungcha hram ri hriat lohna ram chu thlaler ang mai a lo ni thei dawn hial a ni. Heng avangte hian keimahni zir loh avanga chhiatna leh harsatna kan tawng buak thil hi a awm theih ve bawk avangin kan ram chhunga chhiatna tam tak hi kan pumpelh thei a ni tih hi hriat thar leh a tul hle a ni.