Japan ram chuan kum 150 dawn hnua khua a lum ber ni an tawng thar.
Khaw lum uchuak tak an tawrh avang hian thuneitute chuan power indaih lohna a thleng thei nia sawiin mipuite chu a theih chen chenah ren turin an ngen lawk tawh.
Power ren turin ti mah se sorkar chuan khaw lum lutuk laka intihdaih nan air condition hmang turin an ti tho va, hei hi khaw lum tuar lo damdawi ina lut an tam lutuk tur ven nan a ni.
Khawchin zirtute chuan khua hi a la chhunzawm rih deuh dawn niin an sawi bawk.
Mihring khawsak danin a zir loh avanga sik leh sa inthlak nasa avangin khaw lum uchuak tak tak hi khawvel hmun hrang hrangah a tam sawt a, a na sawtin a hun chhung pawh a rei sawt thin.
Khawvel pum hi industrial era an tih ai khan chawhrualin 1.1°C chuangin a lum tawh a. Ram hrang hrangten a tilum belh theih thil an tihchhuah an titlem lo a nih chuan a lum tawlh tawlh dawn bawk.
Tokyo-ah hian Nilaini khan 35°C chuang a ni a, kum 1875 hnu lamah June thlaa a lum ber tum a ni.
Hetih lai hian khawpui hmarthlang lama awm, Isesaki khawpuiah phei chuan 40.2°C zeta lum a ni a, hei hi Japan ram puma June thlaa a lum ber tum a ni.
Social media hmangtute chuan Twitter-a khaw lum lutuk chu an tar lang chuah chuah hlawm.
“Ka chhuak chiah a, pawn lam chu a lum lutuk ringawt, self-sauna a ni ringawt. Tuia inbual ka duh,” tiin pakhat chuan a tar lang.
“Zing atangin pawnah ka awm a, lum lutuk avangin ka tui ral lo chauh a ni,” tiin pakhat chuan a tar lang bawk.
Mi dang leh phei chuan, “A lum lutuka kan hnathawhna hmuna kan fire alarm chu a short-circuit ringawt,” a ti a. Thlai tihtiahna hmuna tui pea an phuhna thin (water sprinkler) thi/nung thei lo thlalak a tar lang tel.
Thawhlehni khan tual chhung thuneitute chuan mipuite hnenah power indaih lohna a awm thut theih avangin ren tura ngenna an lo chhuah tawh.
Hetih rual hian khaw lum lutuk avanga buai an awm an hlau va, a bikin kum upa lamte chu intihdaih dan dap hram hram turin an ngen.