Sorkar laipuia thawkten dearness allowance (DA) an lak zat 34% pek phuta sorkar kar mektu, Federation of Mizoram Govt. Employees & Workers (FMGE&W) chu sorkar hotuten sum harsatna hrethiam tura an ngen angin sorkar an nawrna chu an titawp rih dawn a, sorkar an ngaichang dawn.
Tar lan tawh thin angin Mizoram sorkar hnuai hnathawk pawl hrang hrang inzawmkhawm, FMGE&W hian DA 34% pek phutin state sorkarah vawi eng emaw zat ngenna an lo thlen tawh a, June 27 atanga July 1 chhung khan sorkar kar nan an hnathawhna hmunah badge dum an lo bel tawh.
Badge dum bela sorkar an kar hnu July 4, 2022 khan sawm an nih angin FMGE&W hruaitute chuan Deputy Chief Minister Tawnluiah pisaah an leng a, hetah hian Health Minister Dr R Lalthangliana pawh a tel.
Dy CM leh cabinet minister hian an phut ang ngeia DA 34% pek chu sorkar duh dan a ni thu te FMGE&W hruaitute chu lo hrilhin, hetihlai hian sorkar sum harsatna avangin sorkar hnathawkte thil phut chu an tihlawhtling thei lo a, hrethiam rih tur leh sorkar sum dinhmun a thar veleh an duhna te chu tih puitlin sak ngei an tum thute an hrilh.
Sorkar aiawh leh FMGE&W hruaitute inkawmna hi nimina FMGE&W Executive Committee thutkhawmah ngaihtuah a ni a, sorkar hotute ngenna chu zahawm an ti a, sum dinhmun a that huna DA 34% pek ngei an tum thu an sawi chu ring tawkin lungawi lohna lantir tawh loa sorkar ngaihchan an rel tlu ta a ni.
FMGE&W Secretary General J. Ramdinmawia chuan, “Sorkar hotute min ngenna hi zahawm kan ti a, sorkar ngaihchan kan titlu ta a, kan thlutlukna hi kan pawm tlang khawp mai,” tiin The Zozam Times a hrilh.
Sorkar hnathawkte hian an intelkhawmna pawl kaltlang hian DA 17% an lak thin chu tihsansak turin February thla khan an lo ngen tawh a, sorkar kar nan badge dum belte pawh an tituah laiin sorkar an DA chu 28%-ah a tihsan avangin an lo thulh tawh.
Hemi tum hian sorkar hian sorkar kum tharah DA 31%-a tih pun an tiam a, sorkar hnathawkte thil phut tak chu sorkar laipuia thawkte lak ang 34% lak a ni a. Sorkar kum a thar hnuah pawh 34% chu sawi loh 31% pawh pek an nih loh avangin sorkar an kar a, ni nga lai badge dum an bel a; na zawka hmalak an tum mek laiin sorkar hotute ngenna angin sorkar kar rih loh an titlu ta rih a ni.