- Ruata
Toyota chuan kar hmasa lawk khan an midsize SUV thar Urban Cruiser Hyryder chu an rawn phochhuak ta a, hei hi lei theih tura tlangzarh fel a la ni lo a. Tunah hian dealership hrang hrangah mipuite en theih turin dah a ni tan mek a, Rs. 25,000 chawiin a book theih bawk a. He SUV thar hi an tlangzarh fel hunah Toyota tana an tihchhuah leh tur hmabak awm chu an MPV lar leh tha tak mai Innova thar Innova HyCross a ni dawn a ni.
Toyota Urban Cruiser Hyryder hi August thla atangin Bidadi, Karnataka-a Toyota plant-ah customer te ta tur siamchhuah hna tan a ni dawn a. Toyota Urban Cruiser Hyryder an tlangzarh tak hi Toyota atanga lirthei tui hehlo pawl tak tur a ni a, hei hi a hybrid system tha takin a puih vang te pawh a tih theih awm e. A lirthei tui hmang miah lo hian, a electric khawl neih tel hmang hian km 25 lai a tlan thei a, hei hi he lirthei huang, midsize SUV huangah chuan India ramah chuan a hmasa ber leh chhinchhiah tlak tak a ni a, hei mai bakah hian all wheel drive system chu mild hybrid set up angin a nei tel bawk a, hei hi he lirthei huanga a vawikhatna a ni bawk a ni.
Toyota hian Hyryder mai ni lo an MPV lirthei lar leh lei hlawh tak Innova pawh a chhuak thar Innova HyCross tichhuak turin an buaipui mek a. He MPV thar tur pawh hi an enchhin deuh reng tawh a, India ram kawngpui hrang hranga an enchhin lai pawh hmuh tur a awm nual tawh a ni. Hei pawh hi a chhuak lo turah beisei a ni a, thawm a nei lian leh tawh viau a ni. Report thenkhatin an tarlan dan chuan khawvel pum huapa an phochhuah hun tur hi tun Diwali lo awm tur chho vel hi a nih hmel a, kumin kumtawp lam emaw nakum kumtir teah emaw lei theih tur erawh chuan an tlangzarh hman beisei a ni bawk a ni.
Hyryder ang chiahin a hminga kan hmuh tel ang hian Innova HyCross hian hybrid powertrain tha tak a neih hmel a. Tuna chhuak mek Innova Crysta erawh hi chu a chhuak reng tho ang a, tunah pawh hian India ramah chuan leitu leh hmangtu an tam em em a, sorkar leh mimal pawha mi pawimawh phurh nan pawha lirthei hman tlanglawn tak a ni a. A thar chhuak mahse a la chhuah zui zel hmel a, tlem tihdanglam leh tuai thar deuh erawh an neih ve tho hmel a ni.
Tuna Innova chhuak mek hian ladder-on-frame chassis a hmang a, hei hi a thar lo chhuak tur Innova HyCross-ah chuan a awm dawn lo a, car tam zaka kan hmuh ang monocoque frame a rawn hmang tawh thung dawn a ni, hei hi report thenkhatin an tarlan danin Toyota global TNGA-C/GA-C (Global Architecture) a ni dawn a ni.
Hei bakah hian design danglam leh tunlai tak a rawn nei ang a, crossover lirthei huanga mi lirthei chhuak ho design leh profile ang pawh kan hmuh hmel bawk. A design thenkhatah hian tuna Indonesia leh Thailand vela chhuak mek ang, Veloz MPV ho design chu eng emaw chenah a rawn tawm hmel bawk a ni. Monocoque architecture a neih tawh dawn loh avangin Innova HyCross tuna chhuak mek ai hian a zang daih zawk dawn a. Hei hian a performance mai bakah a lirthei tuih hehloh thuah pawh nasa takin a pui dawn a ni.
Report thenkhat chuan Toyota Innova HyCross hian 2.0-litre petrol hybrid powertrain hmang dawn niin an tarlang a. Company lam hian India rama tana duan THS II (Toyota Hybrid System II) an hmantir hmel bawk a ni. He system hi twin-motor setup, a tui heh si lo a, he lirthei tichak tha thei tur a ni a. Innova HyCross-ah thung hi chuan diesel khawl kan hmu dawn lo a, petrol hmang chiah a awm hmel a ni.
Engpawhnise, Toyota hi company tha tak, lirthei pawh tlo leh tha tak tak siamchhuaktu an ni a, an lirthei thar chhuak mai tawh tur Hyryder leh a chhuah hun tur leh a chanchin pawh an la puan chian loh, chhuak tep tawha ngaih theih, Innova HyCross te lo chhuah hun tur hi a nghahhlelhawm hle a. Innova thar tur pawh hi tun aia kimchang leh dik zawk hian a lirthei nih phung tur kan hriat theih ngei a beiseiawm a ni.