India rama tun hnai hun eng emaw chen coronavirus kai hmuh chhuah zat a tlahniam hleithei lo va, darkar 24 liam ta chhung pawh khan mi 16,159-in an kai tih hmuh chhuah leh a ni.
COVID-19 kai hi mi 4,35,47,809 zet an awm ta a, a kai hmuh an tam leh deuh avangin enkawl lai pawh pung hret hretin mi 1,15,212 an awm mek niin union health ministry chhinchhiahnaah tar lan a ni.
Darkar 24 liam ta chhung hian mi 28-in hri leng hi thihpui leh hmanin mi 5,25,270-in an thihpui tawh.
India-ah hian hri kai hmuh chhuah tawh zawng zawng atanga chhutin enkawl lai hi 0.26% an ni mek a, 98.53% erawh enkawl dam leh tawh an ni.
Darkar 24 liam ta chhung hian enkawl dama chhuahtir aiin a kai hmuh an tam zawk avangin enkawl lai hi mi 737-in an pung leh hman a ni.
Darkar 24 liam ta chhunga sample endik zinga 3.56% chuan hri an kai tih finfiah niin chawlhkar khat liam ta chhunga endik zinga 3.84%-in an kai bawk tih ministry chuan a sawi.
Hri kai hmuh tawh zinga mi 4,29,07,327 chu enkawl dam leh tawh an ni a, 1.21%-in an thihpui tawh thung.
Invenna pek beihpui thlak kal mek zelah vaccine dose vaibelchhe 198.20 pek a ni tawh.
Darkar 24 liam ta chhunga thi mi 28 hi Kerala leh Maharashtra-ah paruk ve ve, Delhi leh West Bengal-ah li ve ve, Goa leh Karnataka-ah pahnih ve ve, Haryana, Madhya Pradesh, Punjab, Rajasthan, Tamil Nadu leh Uttar Pradesh-ah pakhat theuh an ni.