India sumdawnna khawpui lian, Mumbai leh a chhehvel chuan ruah tam tak an dawn hnuah Nilaini khan a mi cheng maktaduai tel an buai phah.
Hun eng emaw chen ruah a sur hnuah khawpui chhung hmun eng emaw zatah tui tling kawng thleng thlenga dai ngai a awm a, tui a lian nasa hle.
Weather department chuan khawpui leh a chhehvel district-te chu inralrinna sang ber dawttu, orange alert a pe a. Ni nga lo awm leh tur chhunin ruah tam tham tak sur thei niin a sawi lawk.
India rama rikrum thil a thlena nunna atana a hlauhawm china che chhuak thin, National Disaster Response Force tem pawh chhiatna thleng thei a nih avangin che chhuak thuai thei tura inrintir an ni.
Mumbai khawpui awmna, Maharashtra-ah hian fur ruahtui tla a tam thin a, kum tin tun ang hun velah hian a sur nasa thin hle a. Lo neiha innghat mi maktaduai telin an thlai tam zawk a thar theih nan ruah hi an hman tangkai rualin khawpuia cheng mi tam tak an buai phah thin.
State mipuite buaia tui lian, tling leh khawlaia chirh tam lutuk avanga an buai mek laiin Thawhlehni khan Maharashtra chief minister thar, Eknath Shinde chuan disaster management control room tlawhin chhanchhuah leh mi puih dan hnathawhte a enpui.
Hmun tamtakah khawpui inkalpawhna rel, Mumbai-a an transport system pawimawh ber chu a kal mumal thei lo va, hei hi khawpui pawh a chet hleih theih loh chhan lian tak a ni.
Thane district-ah chuan hmun hniama cheng mi tam tak chu an chenna in tuiin a chim avangin tawmhimna tura an siamah an insuan lut a. Mumbai daia luang, Kundalika lui pawh hlauhawm chhinchhiahna chungah a luang niin news agency PTI chuan a tar lang.