National Health Mission (NHM) hnuaia thawkten sorkarah thil phut hrang hrang an nei a, an duhnate tihhlawhtlin a nih loh avangin December 17-20, 2021 chhung khan a huhoin chawlh an lo la tawh a, kum a thar hnuah pawh sorkarin a la ngaihsak tawk loah ngaiin ni thum chhung, July 11-13 chhungin an chawlh leh dawn.
NHM Employees Union Mizoram (NEUM) chuan a ngheta la tur te, a hun taka hlawk an lak theih nana hma la tur te, medical reimbrushment pangngai hmantir ve tur te, transfer TA pe tur leh health department hnuaia hna laka NHM contractual staff-te tana hamthatna neih tur tein sorkar an lo ngen tawh thin a ni.
Heng an thil phut hrang hrangte hi sorkarin a tihhlawhtlin loh avangin December 17-20, 2021 chhung khan mass casual leave an lo la tawh a, Covid-19 leng avanga ram pum a buai lai a nih avangin hriselna lama inenkawlnain a tuar a, sorkar chuan health department hnuaia thawkte nawrh khapna thupek a chhuah hnan hial.
Kumin March 14-17 chhung khan an thil phut tihhlawhtlin a nih loh avanga lungawi lohna lantir nan an hnathawhna hmunah badge dum an bel leh a ni.
Sorkara an thil phutte hi tun thlenga tihhlawhtlin a la nih loh avangin nawrh an tintuah leh mek a, nimina NEUM Executive Committee thukhawm chuan sorkarin a ngaihsak tawk loh avangin July 11-13 chhungin a huhoin chawlh lak an rel leh.
Hemi chungchanga thuchhuah an siamah chuan, “Kan sorkarin NHM contract staff-te hmakhua ngaihtuahna tur study group a din report leh hmalakna chungchang chu April, 2022-ah zawh fel a ni tawh a, tun thlenga engmah hriat tur pawh la awm lo te, vawi tam tak sorkar hotute leh department hotute kan dawr chung pawh ngaihsak tak tak kan ni lo thin hi hriathiam a har kan ti hle,” an ti.
Hengte avang hian hreh tak chungin ni thum chhung Mass Casual Leave lak an tum a, an thawhpuite leh mipuite hriatthiamna an ngen tih an thuchhuahah chuan an tar lang.
NEUM thuchhuah chuan tunah hian thla thum chhung hlawh la lovin an awm mek tih sawiin, “Thla thum emaw, thla li hlawh la thei lova kan awm a tam ta hle,” an ti bawk.[9:48 pm, 06/07/2022] +91 96128 19840: Bairabi leh Mamit inkar national higway-ah puang thuai dawn
AZL: Thawhlehni khan Rajya Sabha MP K.Vanlalvena leh Road & Infrastructure Development Board Vice Chairman Er H.Lalzirliana, MLA chuan Union Minister of Road Transport & Highway Nitin Jairam Gadkari leh MORTH Secretary Giridhar Aramane chu an office Chamber, Delhi ah an kawm a. Bairabi leh Mamit inkar kawngpui chu double lane kawnga siam a tul thu leh national highway-a puan ngei a tul thu an thlen chu minister chuan tihhlawhtlin ngei a nih tur thu sawiin hun rei lote hnuah puanna order tihchhuah a nih tur thu a sawi nghal a ni.
Sairang to Tripura kawng Double Lane laih mek pawh hun tiam chhunga hna zawh a nih theih nan contractor-te hnenah a hun dikah bill pek a tul thin thu MP leh MLA te hian minister hnenah hian an thlen bawk.
Lawngtlai to Sittwa Sea Port road KMMTTP laih mek chu national interest a nih avangin a hmun ngeia enfiahtu tur, Team of MP tirh rawtna an thlen nghal bawk a ni.
Union minister hi MORTH official-te leh NHIDCL hotuten an tawiawm a. MP Vena leh Zira te hi Lalbiaknunga, EE, PWD-in a tawiawm bawk a ni.