Premier League club Southampton chuan an midfield tichak turin Manchester City atangin kum 18 mi Romeo Lavia an lalut dawn.
Saints hian Lavia manah Pound maktaduai 10.5 an seng dawn a, a khelhdan a zirin Pound maktaduai 3.5 an pek belh leh ang a. An hralh lehna atangin 20% Manchester City hian an tel dawn bawk.
City hian an defensive midfielder hi leilet theihna an nei bawk a, inremna an neih chhungin Pound maktaduai 40 in an lei letleh thei dawn.
Belgium Under-21 international hian kum 2020 khan Anderlecht atangin Manchester City hi a zawm a. Season liamta khan senior team tan a vawikhat nan inlanin League Cup-ah bul an tan tir a, FA Cup-ah vawikhat a khel bawk.
Defensive midfielder che rang Lavia hi a tul angin centre-back ah pawh chhawr theih a ni a. Man City legend Fernandinho leh Barcelona star Sergio Busquets ngaisangtu hian social media-ah club a chhuahsan tur thu a sawichiang tawh.