Italy-a mihring man duh ber, ruihhlo tawlhtu lian, Rocco Morabito chu Brazil-a a tawmnaa man a nih hnuah a chungthu relsak turin Rome luhpui a ni ta.
‘Cocaine king of Milan’ tia an sawi mai thin, Morabito-a hi nikum May thla khan Brazilian leh Italian police tangkawpin beihpui an thlaknaah man a ni.
Kum 55 mi hi ruihhlo a tawlh thin avangin kum 30 lung in tang tura hrem theih a ni.
Mafia boss hi nihna leh hming lem nen South America-ah kum tam tak a biru tawh.
Nikum khan Brazil hmarchhak lama lawngchawlhna khawpui, João Pessoa-ah police chuan an chhui fuh a, a kaihhruai, ‘Ndrangheta pawla member pakhat, Vincenzo Pasquino nen an man a. Pasquino-a pawh hi kum 17 tang tura hrem a ni.
Rome-a Morabito phurh thlen a nih takah hian kum tam tak an lo zawn tawhna chu a tawp dawn ta.
Calabrian-a Africo khuaa piang, Morabito hi mafia boss Giuseppe Morabito nen pawha inzawmna nei a ni a. Reilo teah ‘Ndrangheta-a hming langsar ber niin pawikhawihna hrang hranga a inhnamhnawih bakah Italy leh a chhehvel rama cocaine tawlh luh tam zawk chu a kaihhruaina hnuaia tih a ni.
A tlangval that lai atang tawhin Morabito-a hi Milan-ah chuan ruihhlo tawlh lamah chuan a hming a chher viau tawh a, South America atanga Italian khawpuia ruihhlo tawlh luhna kawng sialtu ber a ni.
Zahawm taka incheiin double-breasted suit a ha deuh reng a; mahse, a hming a than chak em avangin Italian police-te ngaihven a hlawh tan a, an enthla deuh reng tawh a ni.
An chhuinaah South America atangin cocaine tam zawk chawk luh a tum tih an hre zui a; mahse, he thu an hriat ruk hnu lawkah hian a chin hriat lohvin a awm ta daih a ni.
Police hian Brazil-ah a tlanchhia ni ngeiin an hria a, Francisco Capeletto tih hming puin a khawsa niin an hre bawk.
A hnuah an thenawm, Uruguay-ah insawn lehin Punta del Este resort changkang takah kum 13 vel zet a cheng zui ta a ni.
In changkang tak a luah a, a inah chuan lemziak man to tak takte pawh a kawl teuh va; a thenawmte chuan car tha tak tak a khalh an hmu thin a, a fanu piancham a lawm dan a hautak dante an hmuh atangin a hausak dan an ringhlel hlawm hle thin a; mahse, thil sual ti turin an ring chuang lo.
An thenawm khawvengte pawhin an rin hle laiin Morabito-a hian a fanu chu sikulah a hming dik takin a ziak lut a, heta tang hian police-in an ngaihven zui leh ta a ni.
September, 2017 khan Morabito-a chu an khawpui ber, Montevideo-a khualbukah a insuan lut a, hei hi police chuan a nupui nen an intihthiam loh vang niin an sawi.
An man lai hian silai, mobile phone 13 leh a passport-sized photo 150 zet, hmel inang lo tak taka a lanna an hmu tel.
Police-in an man ta nge nge a, Italy-a thawn chhuah tura buaipui a nih mek laiin kum 2019 khan an tanna in chung verhin a tanpui mi pathum nen an tlan chhuak a ni.
Interpol-in beihpui an thlak mek laiin João Pessoa-a khualbukah an chhui fuh ta a ni.
Brazil-a supreme court chuan kar hmasa khan Italy-a thawn chhuah turin a ti ta a ni.