July 18-a India president thlanna lo awm tura National Democratic Alliance (NDA) candidate, Draupadi Murmu-i’n BJP MLA leh MNF MLA-te chu a mah thlawp turin a sawm a. Chief Minister Zoramthanga’n MNF MLA leh MP-ten an vote tur thu a sawi.
BJP leh a thawhpui NDA presidential candidate hian nimin khan lehlangin Mizoram a rawn tlawh a, Aijal Club-ah BJP MLA pakhat leh rorel lai MNF party MLA bakah BJP Mizoram Pradesh hruaitute nen inkawmna an nei.
He huna thusawitu MNF Legislature Party leader, chief minister ni bawk, Zoramthanga chuan MNF party chu NDA dintu zinga mi a nih thu a sawi a, Mizoram Assembly-ah MNF-in MLA 28 a neih leh Rajya Sabha leh Lok Sabha MP pahnihten an vote tur thu a sawi a ni.
Aijal Club-a MLA-te nen an inkawm hnuah Murmu-i hi Raj Bahavan-ah chawl lutin, Larsap Hari Babu Kambhampati nen an inkawm leh a, hemi hnu hian hmarchhak state dangah campaign turin Mizoram a chhuahsan leh nghal a ni.
Lehlanga Mizorama rawn zin, Murmu-i hi Union Minister for Ports, Shipping & Waterways leh AYUSH Sarbananda Sonowal, Assam Minister for Housing & Urban Affairs & Irrigation Ashok Singhal; BJP MP Dr. Rajdeep Roy leh BJP National spokesperson Dr. Sambhit Patra ten an tawiawm a ni.
India president hi parliament leh state tina legislative assembly-a elected member, electoral college-in an thlang dawn a, vote hi parlianment house leh state legislative assembly-ah thlak a ni ang a, vote chhiar erawh Delhi-ah neih a ni thung ang.
Mizorama India president thlanna neih turah hian Election Commission of India chuan Assistant Returning Officer & Presiding Officer atan Mizoram Legislative Assembly-a Commissioner & Secretary H Lalrinawma leh Assistant Returning Officer atan Additional Secretary Lalhmahruaia Zote te a lo ruat tawh a ni.