Aizawl : Lengteng bialtu MLA, Human resource development board vice-chairman L. Thangmawia’n a biala zirna in hrang hrang atanga kumina HSSLC distinction-a pass zirlai paruk te hnenah nimin khan laptop a pe.
Bialtu MLA-in Laptop a pek te hi - Lalrodii, Ngopa HSS; Elizabeth Zoramsangi, Hliappui HSS; JH Malsawmzuali, Lalbiaknungi, Lalhmangaihsangi leh Liandingpuii Sailo, Kawlkulh HSS vek te an ni a. L Thangmawia chuan a biala kumin HSSLC result chu nikum aia a chhiat zawk thu sawiin, zirna lama zirlai ten nasa zawka tan an lak theihna tura cho phurtu a nih beiseia lawmpuina atana Laptop chu pe a nih thu a sawi.
L Thangmawia chuan kumina HSLC distinction-a pass te pawh smartphone pek an nih tawh thu sawiin, tunlai khawvelah smartphone leh laptop chu zirna atana tangkai taka hman theih an nih thu a sawi a. Kumthar 2023-a a bial chhung zirna in te atanga HSLC leh HSSLC distinction-a pass te hnenah pawh pek leh vek an nih tur thu sawiin, "he inelna thianghlim, anmahni tana tha tur, an kalna sikul leh khawtlang an chawimawi theihna ni bawkah hian ka biala zirlaite tel vek turin ka sawm a ni" a ti bawk.