Aizawl: Bible Society of India Aizawl Auxiliary-in kum 2021-22 chhung khan kohhran leh mi inphalte atangin Rs 4,11,84,380 a hmu a, an sum hmuhin a kum hmasa a phak lohna erawh Rs nuai 39 chuang a ni.
July 10, 2022 zana Ramthar Veng Biak Ina BSI campaign neiha tar lan a nih danin, Bible Society rawngbawlna atana sum hnar ber chu kohhran leh mi mal thahnemngaite thawhlawm tling khawm hi a ni a. Kum 2021-22-chhung khan Rs. 4,11,84,380 zet thawhkhawm a ni a. Kum eng emaw zat chhung chu India ramah a sang ber a ni ta.
Kum hnih chhung chu kum hmasa lam pha lovin a kal ta a. Tun tumah pawh hian kum hmasa phak lohna hi Rs. 39,80,222 zet a ni.
Bible Society of India Aizawl Auxiliary hian Mizoram state leh Tripura state pum pui bakah Barak Valley-a district pathum - Hailakandi, Karimganj leh Cachar te a huam a, hemi huam chhungah hian mihring maktaduai 10 chuang an awm a ni.
Aizawl Auxiliary-ah hian branch 55 an awm a, Kohhran hrang hrang 39 zet an thawk ho mek a. Aizawl Auxiliary bik huam chhungah tawng hrang hrang 33 zet a awm a, Bible pum tawng 17-in lehlin a ni tawh a, Thuthung Thar chu tawng chi ngaa lehlin a ni tawh a, bu mal tawng chi khata siam a ni a, project kal mek 10 awmin engmah la nei lo pakua an awm.
Kum 2017 atanga bul tan tawh, ‘Mizo Bible Revised Version’ chu tunah lehlin thar kalpui mek a ni a, Mara Bible Revision zawh tep a ni a, ‘Lehlin thar’ Common Langguage pawh en that hna thawh mek a ni.