West Bengal Chief Minister Mamata Banerjee chuan SSC hna lak dana thil dik lo awm nia sawia an puh ber, Partha Chatterjee chu Ningani khan a cabinet minister atangin a bân ta a, an party chuan khawng takin thil a ti zel dawn tih a sawi.
Trinamool Congress hian Chatterjee hi an party atanga chawlhtirin a nihna chelh zawng zawng atangin an bân.
TMC supremo chuan an hmalakna phenah hian thiltih tur ruahman tam tak a awm tih a sawi a; mahse, chiangin engmah a sawi duh rih lo.
Minister atanga Chatterjee-a bân a nih hma lawk hian School Service Commission (SSC)-in hna a laknaah dik lo taka tih a awm leh awm loh chhuitu, Enforcement Directorate (ED) chuan minister lam hnai tak pakhat, Arpita Chatterjee hnen atangin sum tam tham tak an man leh a ni.
Sorkarin Kolkata-a hun hmanna a buatsaih pakhatah Banerjee-i chuan Chatterjee-a hna chanpual chu a enkawl rih mai dawn tih a sawi.
BJP chuan Chatterjee-a bân a ni chu a tuartu lo zawk turin a tawrhna a nih thu an sawi a. “A tuartu tur lo zawkin a tawrh theih nan Partha Chatterjee an bân a. A tirah a inrawlh lo an ti a, tunah an bân leh si a. Tlai dar 5:00-ah an thukhawm dawn chauh va, Abhishek Banerjee hian thangthat a la duh a; mahse, mipui thinrim an hmu a, a hun hmain Chatterjee an bân ta a ni,” tiin Bengal BJP chief Sukanta Majumdar chuan a sawi tih news agency ANI chuan a tar lang.
Sorkarin thuchhuah a siamah chuan, “Partha Chatterjee, minister in charge, department of industry, commerce & enterprises, department of information technology & electronics, department of parliamentary affairs leh department of public enterprises & industrial reconstruction chu heng department tar lana a chanpual atang hian chhan tha tak avangin hna atanga chawlhtir a ni,” an ti.