Chief minister hlui, Okram Ibobi Singh chuan Manipur-a BJP kaihhruai sorkar chuan coronavirus hri leng mek a hmachhawn danah thil a kalpui thiam lo hle niin a sawi.
“Tun Covid-19 hri leng mekah hian, tuna kan thlen chin hi a mawhphurtu an ni a. BJP-in inthlan atana an campaign lai pawhin mi tam takin inkaihhruaina (SOP) an zawm lo tih pawh ka hmu,” a ti.
Mipuite chu SOP zawm thaa hmai tuam tur te, mi dang hlata awm thin tur leh tha taka an kut sil turin a ngen bawk.
Congress Bhawan-a nimina thuthar lakhawmtute a kawmnaah Singh chuan tun hnaia an MLA bâng tate chuan kum nga pawh hmang zo lova an bâng ta chu mipuite an zah lo hle niin a sawi.
“MLA bâng tate hian anmahni thlang tlingtu mipuite an zah miah lo tihna a ni a, chhan tha tawk awm miah si lovin mipui an phatsan ringawt a ni,” a ti.
Singh hian a kaihhruai sorkar hlawhtlinnate sawiin N.Biren Singh-a kaihhruai sorkar hun chu hun thim (black term) tiin a sawi a. Hma an sawn leh theih nan Congress chu thlang tling leh turin mipuite a ngen.