Serchhip SP Stephen Lalrinawma’n “Mizoramah kum 2000 atangin Human trafficking case kan nei tan a, case kan ngah ber kumah case pasarih ziahluh a ni” a ti.
World Day against human trafficking denchhena nimina Serchhipa hun hmanah he thu hi Serchhip SP chuan a sawi a. Kum 2000 atanga kumin thlenga Mizorama mihring hmanga sumdawnna (human trafficking) case ziahluh tawh zat 35 a nih thu leh a tuartu mi 95 an awm tawh thu sawiin, puitling 62 leh naupang 33 chhanchhuah an nih tawh thu a sawi.
Serchhip SP chuan Mizoramah mihring hmanga sumdawnnaa mawhphurtua puh Mizo 47 leh hnamdang 17 thubuai siamsak an nih tawh thu sawiin, mihring hmanga sumdawnna tuartu zingah foreign-a hna zawngte leh India ram khawpui lian zawka hna zawngte an tam thu a sawi a. An hnathawhna ram azira umzui mai harsa deuh te pawh a awm thu leh chhanchhuah kawngah an va awmna hmuna Mizo welfare ten nasa taka police te an tanpui thin thu a sawi bawk.
Hun kaihruaitu Serchhip Bawrhsap Nazuk Kumar-i'n Serchhip district chhungah human trafficking case awm rih lo mahse, engtiklai pawha thleng palh ve thei a nih avangin inbuatsaih lawk a tul thu a sawi a. A invenna leh a lo thlen palha a umzui hnaah mawhphurtu tam tak an awm avangin a mawhphurtu department-a thawktu ten inpuahchahna tha tak an neih lawk a tul tu a sawi.
Mizoram chu mipui te inpawhna leh inlai- chinna a that vangte, kohhran leh tlawmngaipawlte inpekna avang tein India ram hmun dangte nena huangkhata dah theih nia a lan loh thu Serchhip Bawrhsap chuan a sawi a. "Child labour-ah te, Bonded labour leh prostitution lamah te case kan nei mang lova, amaherawhchu ramria awm kan nih avangin international human trafficking lamah kan mit kan len nasat deuh deuh erawh a tul" a ti bawk.
Police, District child protection unit a thawktute, naupang enkawlna home hrang hra- nga thawk te, Juvenile justice board aiawhte leh official pawimawh dang kalkhawm te chu Delhi-a National commission for protection of child rights atanga lo kal Anshu Sharma-in -Naupang hmanga sumdawnna laka inven dan- tih thupui hmangin zirtirna a pe a, sawihona hun an hmang bawk a ni.