Nitish Kumar chu Nilaini khan Bihar chief minister atan a vawi riat nan lak luh a ni leh ta.
Kumar-a hian Thawhlehni khan BJP kaihhruaia tangrual, NDA sorkara chief minister a nihna chu a bânsan a, hemi rual hian RJD, Congress leh party dangte nen tangrual bawkin sorkarna a siam thei tih thlenin a kaihhruai sorkar thar chu lak luh a nih leh ta a ni.
RJD hruaitu, Tejashwi Yadav chu deputy chief minister atan lak luh ve nghal a ni a. Cabinet pawh India zalenna champha lawmna, August 15-a neih a nih zawhah tihlen zui a nih a rinawm.
Sorkar thar lak luhnaah hian chief minister leh a thachhangdawltu tur chauh lak luh an ni rih a. RJD hruaitu, Manoj Kumar Jha chuan lak luh inkhawm chu mi pahnih chauh ni lovin, Bihar pum huap a nih tho thu a sawi.
Lak luh an nih hnuah hian Kumar-a leh Yadav te hi chibai an inbuk tawn a, Yadav-a hian malsawmna dilin Kumar-a ke a khawihsak bawk.
Thuthar lakhawmtute hnenah Kumar chuan, “Party-in BJP chhuahsan turin inlungrualin thu kan titlu a, kum 2024 thleng he thutthlengah hian ka thu dawn em ka sawi thei lo. BJP chuan an duh duh lo sawi rawh se; mahse, kei chu kum 2014-a mi ang reng khan ka awm thei tawh lo,” a ti.
Kumar-a hian Nilaini khan Lalu Prasad Yadav pawh hmuin an state-a politics inlumleh dan an sawi dun.
JD(U) hruaitu hlui, tuna political strategist ni ta, Prashant Kishor chuan Kumar-a hi kum 2017 atang tawh khan BJP nena inkungkaihnaah hian a nghet tawh lo tih a sawi a, hei hi tuna an inzawmna a chhut chah chhan ber nia a ngaih thu a sawi.
Bihar assembly-a member 243 awmah RJD chu party mala MLA ngah ber an ni ta a, cabinet-ah pawh an tam ber a rinawm a, assembly speaker an chan hmel bawk.
BJP chuan Kumar-a hi nasa takin an bei zui a, MP Ravi Shankar Prasad chuan ‘Congress nen lo’ a tih tlatna thin kha a thlak ta em ni tih a zawt.
“Nitish Kumar-a hi non-Congress hruaitu a ni a, a politics khelh dan pawh non-Congress a ni a. Chu chu a zo ta em ni? Ei rukna leh non-Congress-na chu a inzawm ta! Nitish Kumar-a hian ei rukna leh Congress a awh a, ka lawmpui e! Mipuiin Lok Sabha leh assembly inthlanah an la chhang let ve ang,” a ti.
BJP hruaitu dang, Sushil Modi chuan Nilaini khan Kumar-a hi bei bawkin vice-president nih a duh a, chumi atana dah a nih tak si loh avangin an inzawmna a chhu chat ta niin a puh.