Justice Uday Umesh Lalit chu Chief Justice of India (CJI) 49-na atan ruat a ni tih union law ministry-in Nilainia hriattirna a chhuahah tar lan a ni.
Justice Lalit hian a hna thar hi NV Ramana-a’n a kalsan hun, August 27 atangin a thawk tan dawn a ni.
“India Danpui Article 124-na, clause (2)-in thuneihna a pek angin President chuan Shri Justice Uday Umesh Lalit, Supreme Court-a judge ni mek chu August 27, 2022 atanga Chief Justice of India ni turin a ruat,” tiin hriattirnaah hian tar lan a ni.
Justice Lalit-a hian thla thum pawh tling lo chhung chauh a nihna thar hi a chelh thei dawn a, November 8-ah kum 65 tlingin a chhuah zui ve nghal a ngai dawn a ni.
August 4-ah khan Justice Ramana chuan tih dan thin pangngai angin amah thlaktu tur sorkar laipuia rawtna a thehluhah judge senior ber, Justice Lalit-a hi a rawt a. CJI hian a rawt a ni tih hi amah, Justice Lalit-a pawh a hriattir bawk.
CJI 48-na, Justice Ramana hian India-a court rorelnaa dinhmun sang ber hi S A Bobde hnen atangin April 24, 2021 khan a la chhawng a, thla 16 chuang a awm hnuah August 26 hian a chhuak tawh dawn a ni.