Indopui II-na hun laia Italy-a lui pakhat bomb tla, puak lo chu tun hnai khawkheng nasa lutuka tui a kam hnuah hmuh a ni.
Kg 450-a rit bomb hi River Po kâm nasa takah sangha mantuten an hmu a ni.
Km 650 vela sei lui hi Italy-in kum 70 chhunga khawkheng nasa ber an tawrh mekah hian hmun tam zawkah a kâm a ni.
Khaw lum lutuk leh ruahtui tla tlem lutuk avangin an ram hmar lama lui hi a kâm nasa hle a, sik leh sa inthlak nasa lutuk nghawng ngei a nih rin a ni.
“Po lui kamah sangha mantuten bomb hi an chhar a ni,” tiin sipai thuneitu, Colonel Marco Nasi chuan Reuters news agency a hrilh.
Italian sipai thuneitute chuan amahah hian puak thei kg 240 zet a awm a, Lombardy-a Borgo Virgilio khaw bul lawka July thlaa chhar kha a nih thu an sawi.
A bul hnaia cheng mi 3,000 vel chu insasengtir an nih hnuah Pathianni khan bomb lam thiamten an tipuak a ni.
“A tirah chuan a bula cheng thenkhat chuan insawn an tum phah loh thu an sawi a; mahse, tihpuah dawn hnaihah uluk leh zualin a chinchang kan hrilh a, an inthiarfihlim ta vek a ni,” tiin Mayor Francesco Apori chuan a sawi.
A chung zawn boruak pawh thlawhna thlawh theih loh turin hun reilo te an khar a, luia kal vel pawh an titawp lailawk bawk.