Aizawl : Champhai leh a chhehvela Champhai town multipurpose co-operative societies limited (CTM-PACS) hnuaia hmalakna hrang hrang – Champhai HSS, Drug store, Variety store, Mini bank, office leh an hmalakna lian ber Vavu Dil project-a hmalakna hrang hrangte nimin khan Champhai Bawrhsap James Lalrinchhana’n a tlawh a. CTM-PACS Chairman H.S Vanlalfakzuala leh a thawhpui ten an hmunhma te fanpuiin an hmalak dan te an lo hrilhfiah.
Champhai Bawrhsap chuan CTM-PACS kaltlanga hmalakna hrang hrangte chhuanawm a tih thu sawiin, an hmachhawpte pawh phurawm a tih thu a sawi a. Champhai district bakah Mizoram tana chhawrnahawm a nih theihna tura theihtawp chhuah zel tura chahin, an hmalak zelna turah a theihna zawna theihtawp chhuahpui a inhuam thu a hrilh bawk.
Society School Champhai HSS chu April ni 29, 2013-ah din niin, 2019-ah Lumpsum grant in aid-ah hlankai a ni a. Zirlai 191, zirtirtu 9 leh thawktu dang 3 awm mekin, Arts & Commerce subject zir theihna a ni. CTM-PACS Variety dawr pawh kum 2013-ah vek hawn tan a ni a. Damdawi zawrhna CTM-PACS Drug store erawh chu kum 2019 a hawn tan a ni thung.
Champhai town multipurpose cooperative societies limited (CPACS) hi Champhai Chhungte farming cooperative society tih hming puin kum 1994-ah kuthnathawktu, a bikin Sapthei chingtu mi engemawzât intêlkhâwmin an din a. Kum 2015, November-ah mipui tam zawk tana chhawr tangkai theih turin Champhai town multipurpose cooperative society (CPACS) limited tia thlak a ni.
Kum 2012-ah Primary agricultural credit cooperative societies (PACs) atan thlan niin, August ni 23, 2012-ah PACS office hawn a ni a. Kumtina Society sum khawih chêt zat Rs. vbc 7-8 dawn niin sorkar thuchhuahin a tarlang. Member puitling 162 vel awmin, CTM-PACS Mini bank-ah account hawng mi 558 an awm a, CTM-PACS hnuaia thla hlawh la thawktu 29 an awm mek bawk.
CTM-PACS hian kum 2017 ha IFFCO (Indian farmers fertilizers cooperative limited) atangin Cooperator award a dawng a. Kum 2018-ah NCDC (National cooperative development cooperation ltd, Ministry of agriculture hnuaia statutory body) atangin NCDC Regional award for cooperative merit, 2018 a dawng a, Mizorama Society zinga hetiang award dawng hmasa ber an ni.