August 9, 2022-a state pahnih ramri buaina chungchanga inbia, Mizoram leh Assam sorkar aiawh minister-ten ‘ramri hnaia district deputy commissioner-te chu thla hnih danah vawi khat inbe thin rawh se’ an tih angin nimin khan DC pangate chu Vairengte-ah an inbia a, ramri chungchang bakah kuhva raha sumdawnna chungchang an sawiho.
He thutkhawm 225 CRPF Camp, Vairengtea neihah hian Mizoram chhunga district pahnih, Kolasib leh Mamit DC-te leh Assam chhunga district pathum – Cachar, Karimganj leh Hailakandi-a DC an tel a, anni bakah hian Superintendent of Police, Divisional Forest Office leh SDO (S) te an tel bawk.
Thutkhawm kaihruaitu, Kolasib DC John LT Sanga chuan he thutkhawm kaltlang hian mahni district-a harsatna awmte sawihona hun tha tak neih leh thawhhona tha tak hnuai a chin fel thin beisei a nih thu a sawi.
State pahnih ramri hnaih district DC-te thutkhawmah hian Mizoram leh Assam lama police duty-te inkara inpawhna tha a awm theih nana hmalak dan tur te, ramri hnaiha chengten an huan, lo, ram tha taka an enkawl chhunzawm theih dan tur te, state pahnih inrina bawr vela ram ngaw awmte humhalh kawnga thawhho dan tur te, ramri kâna dan phal loh ramsa tawlh rukna awm thin ven dan tur leh ramria police duty-na hmun thawm that hna hrang hrang kalpui a nih ruala heng duty-na hmun kaltlanga hmalakna awm lo tura ruahmanna siam a tul thu te an sawiho a ni.
Heng bakah hian Mamit district-a kuhva chingtuten an kuhva rah hralhna kawngah Assam lama harsatna an tawh thin thute pawh thutkhawmah hian sawi lan a ni a, Mizoram chhunga kuhva hring thar chhuahte chu harsatna awm lova hralh a nih theih nan hmalak dan tur sawiho a ni.
Thinghlun khaw bula Tlawngte luia lei dawh hna leh Zophai, Bairabia lei dawh hna chhunzawm dan tur pawh sawiho a ni a, harsatna lian zual awmte chu chin fel a nih theih nan hotu lian zawkte hnen a thlen tur an rel bawk.
He hunah hian CRPF DIG Shanawaz pawhin thu sawiin ramria duty hna chu uluk takin an kalpui thin thu a sawi a, mipuiin harsatna thenkhat an lo thlente chu sutkian a nih theih nan duty-na hmun pawimawh zualahte chuan CCTV nen thlithlai thin a nih thu a sawi bawk a ni.