Sialhawk khuain an thar chhuah lakhuihthei (pineapple) kilogram 300 chu Dubai, United Arab Emirates (UAE) leh Bahrain-a hralh turin thawn chhuah leh a ni.
Fair Exports (I) Pvt. Ltd. bawkin Sialhawk lakhuihthei hi la lehin, tun tumah hian thlawhtheihnaa a phurh man zawng zawng hi an tum vek bakah Mumbai-ah kg khat Rs 30-in an lei dawn a. Indawrna a kaltluan chuan ni hnih thum hnu velah Bahrain leh Doha-ah thawn leh theih beisei a ni.
Sialhawk khuaa lakhuihthei chingtute hian kumin hian lakhuihthei quintal 5,000 vel an hralh chhuak tawh a. Mizoram chhung bakah Assam leh India ram pawnah an thawn chhuak a, kuminah quintal 10,000 vel thar chhuak turin an beisei a ni.
Sialhawk Pineapple Grower Society hian an lakhuihthei hralhna tiawlsam turin APEDA (Agricultural & Processed Food Products Export Development Authority) kaltlangin Central Transport Subsidy an dil mek a. Tun dinhmunah chhanna engmah an la dawng rih lo.
Sialhawk VC Vice President J. Rampanmawia chuan Assam leh Tripura chuan an thlai tharte ram danga thawnna tur thlawhtheihna phurh man hi sorkar laipuiin APEDA kaltlangin a tumsak vek thin a. Chutianga transport subsidy an hmuh ve theih hunah chuan awlsam leh hlawk zawkin Sialhawk lakhuihthei bakah Mizoram thlai thar dangte pawh ram danga thawn chhuah theih a beiseiawm hle niin a sawi.
J. Rampanmawia chuan Sialhawk atanga Dubai thlenga an thlai tharte hralh a nih theihna tura sum leh pai senso ngai zawng zawng chu Tuichang bialtu MLA, Deputy Chief Minister Tawnluia’n a tum vek thu a sawi bawk.
Dy CM Tawnluia hmalaknain tunah hian Sialhawk lakhuihthei hi a tui sawr turin Chhingchhipa MIFCO hmunah pek tura hmalak mek a ni bawk.