Aizawl: India Formasa, Angel Business Promoters leh Tharthilthlentu (TiLi) buatsaihin thingpui sawngbawl dan (Tea Symposium) zirhona neih a ni.
Nilaini khan Aijal Club-ah National Chung Hsing University, Taiwan atanga mi thiam lo kalte nen thingpui sawngbawl dan zirho a ni a. Hawnna inkhawmah Deputy Chief Minister Tawnluia chuan Mizorama thingpui chingtute leh agriculture-a innghat lo neitute hmasawnna tur kawng ngaihtuah tura Taiwan atanga lo zin, National Chung Hsing University Professor leh zirlaite chungah lawmthu a sawi a. A bik takin thingpui chingtute tan an tharchhuahte Taiwan thingpui tha mi – premium brand ang tluka sawngbawl dan tur ngaihtuahpuia thawhhona tha tak an nei thei tur chu lawmawm a tih thu a sawi.
Kum 2019 khan Taiwan atanga mi thiamte lo zinin Mizoram atanga thar chhuah thingpuife zirchiang turin an ramah an hawn a. Anmahni sawngbawl dan anga sawngbawlin man to zawka hralh theih turin an siam chhin a. Tun tumah hian an hmalak tawhnate bawhzui tura lo kalin thingpui thar chhuah tamna khua – Biate, Darzo leh Reiek te fanpui an ni.
Tea industry chauh ni lo agriculture-a innghat industry dangah pawh thawhho theih dan kawng dap a nih tur thu Formosa Foundation India Chapter Chairman Jonathan Lalremruata chuan a sawi.