Portuguese football club Benfica in UEFA Champions League group stage khel turin hnehna an chang a. An mikhual Dynamo Kyiv chu 3-0 in an hneh.
Thawhlehni zanah Lisbon a Estadio da Luz-ah Benfica hi 5-0 aggregate in an chak a. UEFA Champions League Qualifying Playoff Round first leg-ah 2-0 in an chak tawh.
Benfica in an khingpuite lakah an inkhelh chhungin harsatna em em an nei lova. Forward David Neres chuan goal mawi a khung bakah Nicolas Otamendi goal hmahruai khung tur a siamsak a. A ball vawrh luh tha chu Argentine defender tawnhriat ngah in a tauh lut.
Rafa Silva pawhin first half-ah goal khungin an khingpuite centre-back Oleksandr Syrota tihsual chu remchangah a la a. A ball pass sual chu la in goal-ah a khung.
Dynamo in an ram buai chunga football season an tan leh zanah Europe inelna lian group stage an kai zo lova. Hetihlai hian Benfica hian tunhnai season 13 chhunga a vawi 12 nan UCL group stage an khel dawn.
Inkhel dangah Israel club Maccabi Haifa chuan Red Star Belgrade tlawhin 2-2 in an draw a. Huntawp dawna goal an khung chu an tana lawmna siamtu niin 5-4 aggregate in an tlang.
Belgrade a Rajko Mitic Stadium a inkhelah Red Star Belgrade in hun rei tak chhung 2-1 in hma an hruai a. Tlang turin beisei an la nei.
Nimahsela an substitute Milan Pavkov chuan huntawp dawn tawhah an lamah a ti lut palh a. Maccabi Haifa an lawm.
Serbian club tan Aleksandar Pesic leh Mirko Ivanic ten goal an khung a, halftime dawnah Haifa tan Daniel Sundgren chuan goal khungin aggregate-ah team pahnih an intluk a. Extra time erawh khelh ngai lovin Haifa in goal an neih belh ta zawk.
Czech team Viktoria Plzen pawhin Jan Kopic goal hnih khung an tlinpui ve bawk.