Beiseina sang tak nei chunga basketball inkhel ngainatuten an thlir zing ami Oklahoma City Thunder rookie Chet Holmgren chu a ke phah ruh a tihnat avangin 2022-2023 season a inkhel dawn lo.
Kum 20 mi Holmgren hi kumin NBA Draft-ah pahnihna a Thunder in an thlan a ni a. Palian a ni chunga ball a shoot thiam avangin a lakah beiseina a sang.
NBA team a mi tharte leh player tawnhriat la nei tlemte inkhelhna thin Summer League-ah pawh ngaihven hlawh takin a khel tawh a. Tunhnaia league pawn a CrawsOver Pro-Am event a LeBron James te nen an inkhelhnaah a inti na.
Thunder general manager Sam Presti chuan, “Tunhnaia a chetdante kan hmuhin kan phur hle a, hei vang hian pawi kan ti hle a, ani pawh pawi kan tihpui. Chutihrualin a inpekna leh tumruhna kan hmuh atangin a lo kir leh hun kan nghakhlel hle.” a ti a. An player lo kir lehna tur hi an hmanhmawh dawn lova, a dam chian phawt an nghah tur thu a sawi bawk.