Congress-in kum 2024 inthlanpui atana indin thar leh tuma hma an lak urhsun lai taka Azad-a a bâng hian engnge a tih zel dawn tih titi a tam nghal hle a, party thar a din mai rinna a lian hle.
India-a civil mite chawimawina dang ber pathumna, Padma Bhushan dawng tawh, Congress-a kum 52 lai awm tawh hian a bânna lehkha a thehluha a ziahah pawh party thar din hi ngaihbel tur a awm nia sawi a ni.
“Kei leh ka thawhpuite chuan Indian National Congress pawnah puitling zawng zawngte tana inhlan kan duh a ni,” tiin a ziak a ni.
Nikum khan Amarinder Singh chu an state inthlan hma lawkin Punjab chief minister atanga chawlhtir a nih hnuah Congress a chhuahsan a. Party thar din zuiin BJP tangrualin inthlan an chuh zui.
Hetih lai hian Haryana hruaitu, Kuldeep Singh Bishnoi chuan Azad-a a ban hnu lawkah hian Jammu & Kashmir chief minister hlui hi ‘BJP-a lut turin an lawm’ tih a sawi a. Bishnoi-a pawh hi tun hnai lawka grand old party chhuahsana BJP zawm a ni.
Azad-a hian a lehkhaah hian Congress chu BJP tana hmun siamsaktu angin a ziak a ni.