Aizawl: Joint Action Committee on Serchhip District Hospital Site chuan Serchhip District Hospital Building thar sak thuai a nih theih nan Public Interest Litigation (PIL) theh luh an rel.
Zirtawpni khan Serchhip Press Club-ah thukhawmin Joint Action Committee on Serchhip District Hospital Site hian kum 100 awmna Serchhip District Hospital chu Power Frid Corporation of India Ltd.-in an Corporate Social Responsibility (CSR) Fund atangin Rs. nuai 2,100 hmangin thla 24 chhung sak zawh turin a ruahman niin an sawi.
District Hospital thar sakna tur atan hian Serchhip Dist. NGO Co-Ordination Comtt. chuan Bukpui ram rawtin thuneitute pawhin ruahmanna thui tak kalpui hman mah se, NGO Co Ordination Comtt.-in a ram chungchangah tihfel ngaite an tihfel lawk loh avangin a dinna hmun ngaia sak turin Detailed Project Report (DPR) siam niin, chumi tur chuan Power Grid Corporation of India Limited hnen atangin Rs. 21 crores hmuh a ni ta niin an sawi.
May 27, 2022 daiha MoU ziah tawh, vawiin thlenga hmalakna a la awm loh chungchangah hian Joint Action Committee on Serchhip District Hospital Site chuan Serchhip District Hospital building thar sak thuai a nih theihna tur leh a hmun ngaia sakna tura DPR siam leh sum pawh dil chhuah a nih ang ngeia Bukpui rama sa loa a hmun ngaia sak a nih leh ngei theih nan PIL file mai an rel ta a ni.
Thutkhawmah hian Bukpuia damdawi in thar sak a nih theihna’na hma latu Serchhip Dist. NGO Co-Ordination Comtt. te chu chawlhkar thar, August 29, 2022 khian Serchhip Press Club a inbiak puiah sawm an rel a, a tuk-ah Press Conference koa Serchhip mipui hnenah thil awmzia puanzar a, chumi hnu ah Health Minister hmuh leh nise tiin an rel bawk.