Lunglei district, Thangpui khuaa Govt. Primary School-a pawl khat zirlai hmeichhe naupang a uniform hak lai hlihsaka saruaka an sikul atanga hawtirtua puh zirtirtu chu school education department-in show cause notice an pe a, MZP-in zirtirtu hi a hna atanga chawlhtir turin thuneitute an ngen.
Tunlaia social media-a sawi zui hlawh tak chu nu pakhatin a fanu laka a zirlaipui leh an zirtirtunu chet dan chungchang a ni a, a fanu chu an zirtirtunuin a school uniform phelhtirin saruakin a hawtir tih a tar lang.
Facebook-a post a siamah chuan a fanu chu a zirlaipuiten kut an thlak fo a, thiin a luak phah thin tih tar langin, a fanu kutthlaktu chu an sikulah kalchilhin a hau a, hei hi an zirtirtunu chuan a huatpui a, a fanu chu sikul a kal tawh loh tur thu a lo hrilh tiin, hemi hnu hian a fanu chu an zirtirtu nu hian saruakin sikul atangin a hawtir tih a tar lang.
He thil thleng chungchang hi school education department chuan an chhui chiang nghal tih an Director Dr H Lalthlangliana chuan The Zozam Times zawhna chhangin a sawi.
Education director chuan Lunglei district SDEO chu enquiry la nghal tura a hriattir thu leh Zirtawpni khan a hnenah report a theh lut tawh tih a sawi a, “SDEO hian naupang chunga mawi lo taka che zirtirtunu chu show cause notice a pe nghal a, August 29, 2022 ral hmaa insawi fiah ngei tura tih a ni,” a ti.
Pawl khat zirlai hmeichhe naupang chunga hleilenna a thlen chungchangah hian MZP pawhin hma la nghalin naupang chu Rs 2000-in an kan a; an zirtirtu nu chu a hna atanga chawlhtir nghal turin thuneitute an ngen.
Hemi chungchanga thuchhuah an siamah MZP chuan, Govt Thangpui Primary School-a pawl khat zirlai hmeichhe naupang chunga thil duhawm lo a thlen hun chu August 24 leh August 25 a nih thu sawiin, a zirlai naupangpuiten kut an thlak thua remna siam loa hmeichhe naupang chunga mawi lo taka che chu Lalbiakengi, SSA teacher a ni thu an tar lang.
MZP chuan hmeichhe naupang hian a taksaah harsatna tawkin John William Hospital, Lunglei-ah enkawl mek a nih thu tar langin, Lalbiakengi chet dan hian human rights nasa tak a bawhchhiat thu leh zirtirna hna hi chhunzawm zel tlakah an ngai lo va, hremna mai piah lamah dan anga a hna atanga chawlhtir ngei turin thuneitute an phut tih an tar lang bawk a ni.