School Education changtu Minister of State Lalchhandama Ralte-in sorkar leh private school-ah Myanmar rambuai avanga raltlan naupang 2064 admit an nih thu sawiin, a remchan dan anga zirlaibu leh an mamawh dang ngaihtuahsak thin an nih thu a sawi.
India zalen champha lawmna Independence Day kumina Champhai-a lawmna a hmanpuinaah Minister of State Lalchhandama Ralte chuan he thu hi a sawi a. Sorkar en- kawl primary leh middle school zawng zawngah zirlaibu leh uniform pek an nih thu leh sikul zawng zawngah library tihchangtlunna tur lehkhabu engemawzat pek a nih thu a sawi bawk.
Labour, Employment, Skill Development and Entrepreneurship (LESDE) Minister ni bawk Lalchhandama Ralte chuan COVID19 leng karah a enkawl LESDE department hnuaia Welfare board-in hnathawktute chhawmdawl nan active member-te hnenah Rs 3,000 theuh a pe tih sawiin, hemi atan hian Rs 15, 82,41,000 sem chhuah a nih thu a sawi a. Fo- od, Civil Supplies & Consumers Affairs department kaltlangin welfare board member te hnenah thlakhat ration pawh sem a nih thu leh hemi atan hian Rs 6,40,67,820 sen a nih thu a sawi.
Welfare board member COVID19 kai leh COVID19 kai nunna chan chhungte tan COVID19 special package siam a nih thu pawh sawiin, CO- VID19 kai 1425 leh COVID19 kai nunna chan 3, an vaiin mi 1428 te tan Rs 2,87,01,000 pekchhuah a nih thu a sawi bawk.
Lalchhandama Ralte chuan nikuma Independence Day leh kumina Independence Day inkarah Champhai Bawrhsap pisa atangin ILP 435 pekchhuah a nih thu sawiin, heta tanga sum hmuh Rs. 15,88,690 chu sorkar sum bawma chhunluh a nih thu a sawi a. Hemi hun chhung vek hian Champhai dist Bawrhsap pisa atangin mi 3331 te biometric enrolment (Aadhaar) tihsak an nih thu a sawi.
Raltlan buaipui leh inrelbawlna hrang hrang atan Rs. 1,15,78,8250 sen a nih tawh thu Lalchhandama Ralte chuan sawiin, Police department hmalaknain Heroin kg 11 leh gram 786, Rs. nuai 290 chuang man hu leh Methamphetamine mum 76400, Rs. nuai 176 chuang man hu man a nih thu a sawi a. Ramri kana lakluh ramsa chi hrang hrang 500 vel man a nih thu leh hengte hi District wildlife crime control unit kaltlanga Customs preventive force hnena hlan a nih thu a sawi bawk.
School Education changtu Minister of State Lalchhandama Ralte chuan District education office building thar, Rs. nuai 200 senga sak chu luahfel a nih thu tawh thu sawiin, DIET building vertical extension pawh khawih mek a nih thu leh Girls’ hostel tur pawh sak tan mek a nih thu a sawi bawk a ni.