Bamboo Development hnuaia mau chingtu te hnenah Horticulture department, Kolasib Division chuan litre 1000 dawng tuizem a sem chhuak a, he hun hi Supply Minister K Lalrinliana chuan khuallian niin a hmanpui.
Inrinni khan Block Horticulture Office Thingdawl hmunah Horticulture Department Kolasib Division chuan Damdiai Bamboo Growers Society, Kolasib-a Brandasi leh Longiphathus mau chingtu mi 30 te hnenah tuidah khawlna tuizem litre 1000 dawng a sem chhuak a ni.
District Horticulture Officer (DHO) C. Zosangliana kaihhruai tui dah khawlna sem inkhawmah Supply Minister K.Lalrinliana hian Mau chin chu tha a tih thu sawiin, Mau tha chi chin tur pawh hi tih tak zeta kalpui chuan eizawnna tling anih a rin thu a sawi a, Mau hi thil thang duh leh manhla tak anih thu leh a tuai ringawt pawh sum chang thlai, hlawk pui tham anih thu a sawi.
K. Lalrinliana hian Mau chin anih danah Zau (Compact area) anga kalpui a ni chu tha a tih thu leh Zau anga hmalakna kalpui an ni chu, a chingtu te tan leh a lei tu tan pawh a awlsam phahin, Mau chingtu te’n an hlawkpui ngei a beisei thu a sawi bawk.
Minister hian Mau chingtu farmer te’n thal chhung pawha thi lo a, an mau chin te an enkawl theihna tur a tuidah khawlna tuizem an dawng chu lawmawm a tih thu leh a lawmpui thu a sawi a, department lam pawhin a enkawlna kawngah theih tawp chhuah pui turin a ngen bawk a ni.
Damdiai Bamboo Grower Society, Kolasib hnuaia Mau chingtu te hi mi 67 niin a thawhkhat nan mi 30 te hnenah Minister K. Lalrinliana’n tuidah khawlna tuizem hi a hlan a ni.