Formula 1 world champion ni lai Max Verstappen chuan intlansiaka a la chungnun ber tum a hmang a. Belgium-ah midang zawng aia tlan chak bik hle in a hnung lam atang tlan tan mahse fal takin hnehna a chang.
Tun season World Championship a hmahruaitu ni lai Verstappen hi Spa-Francorchamps tlankawngah um hleithei an awm lova. Engine part thar hman theih chin bak a hman avanga 14-na a bul tan tir a ni chungin lap 13-naah pakhatnaah a awm thei der tawh. Lap 18-naah car ke a thlak hnuah hma hruai lehin a tawp thleng a hmaah awm thei an awm tawh lo.
A teammate Sergio Perez chu pahnihna niin Red Bull an chungnung larh. Perez ai hian second khat chuanga lap khat tlan chhuah ran zawk a nei fo. Ferrari car khalhtu Carlos Sainz chu pathumna a ni.
Tuma el phak loh Max
Dutch driver hian tun season a intlansiak 14 atang vawi 9 pakhatna a hauhna a ni a, world title inchuhnaah champion turin a dinhmun tha tawh hle in a nghah rei a ngai tawh dawnin a lang lo.
An intlansiakna hmun hi an ram thenawm Belgium-ah a ni a, amah tantu mipui an tam. Intlansiakna tlankawng hi F1 chanchin a tlankawng thui ber niin chak taka tlan theihna lai a tam avangin F1 tlankawng ropui leh ngaihhlut zing ami a ni.
Nipui chawlh hman zawh hnuah Red Bull in team tha an nihna an lantir leh bawk. Kumina an elpui ber Ferrari in tihsual an neih leh thinte sawilan an ni fova, Red Bull team in fak an phuzia erawh hmuh hmaih theih a ni lo.
Season tan tir atanga car nei tha ber pahnih te hi an lirthei theihna san zawngah inthlauhna a tam lo. Mahse F1 team-te inelna pakhat ‘In-season development’ ah Austrian team UK a inkhuar in an chungnun bikzia an lantir. Season kallai a car ti hmasawn turin hna an thawk tha zawk a, team pum angin an tha tih Pathianni zanah pawh a lang.
Verstappen-a Red Bull car hi Zirtawpni practice atang tawhin a tlanchak fal. Team dangten tyre tih lum leh car setup lamah chhanna an zawn laiin an buai ve lo. A tlanchakzia tilang chiang turin qualiftying session hnuhnung berah niin lap khat tlanchhuahah Sainz-a’n a pha lo hle. Engine penalty a neih avangin a hnung lamah bul a tan chauh a ni.
14-na atang tlan tanin lap hmasa ber zawhah 8-naah a chho hman tawh. A car tlanchak mai piah lamah a car in tyre a hmang tlo thei chu a tan malsawmna a ni a. World champion in Belgium intlansiak a car tha ber a khalh chiah chu tu tan mah el phak rual a ni lo.
A car ang khalhtu a teammate Sergio Perez lakah second 18 dawnin intlansiak a zawhin hma a hruai hman. F1 khawvelah chuan second 18 hi inthlauhna lian tak a ni.
Verstappen pawhin Belgium-ah engkim a kal fuh vek tih a zep lo. “Tun kartawp hi thlirlet chuan Free Practice 1 atangin car a fuh hle a, engkim a kal dik vek. Hetiang hi intlansiak apiangah a ni dawn lo tih ka chiang.”
“Tlankawng awmdan in a zir a, a ngil pangngai aiin kan car thatna lan theihna tur a tam. Hmun dangah chuan hetiang hian kan fal dawn lo.” tiin a sawi lawk.
Verstappen-a tan kuminah season ropui tak hman theih a ni dawn. Intlansiak pariat la awm atangin vawi li hnehna a chan leh chuan season khata hnehna chang hnem ber record Michael Schumacher leh Sebastian Vettel ten an chelh mek chu a tluk ang.
Midang zawng
Verstappen ang bawkin Leclerc-a’n engine penalty a neih avangin 15-na atangin bul a tan. Lap hmasa berah Verstappen hi zui ve zelin hmalam pan ve hman mahse driver-te helmet hmai tuamna fim pawhthlak theih chu a brake-ah a tang a, hei vang hian pit stop a siam hma a ngai. Hei hi tawrh phahin intlansiak tawp lamah a tan pangana bak a beiseiawm lo.
Tum dang ang bawkin chet fuh loh an nei leh bawk. Fastest lap in point khat a ken tel an um avangin intlansiak tawp dawnah car ke nem ber vuahin an ko lut. Mahse an ko luh hun a fuh loh bakah a brake a thil tangin ‘sensor’ pakhat a tihchhiat avangin pitlane-ah a tlanchak lutuk a, hremna pek niin paruknaah a tla thla.
Round hmasa a che tha Mercedes an hnungtawlh. Car ke tih lumah harsatna an tawh avangin tun kartawpah an buai. Intlansiak ni ah tlankawng a lum zawk avangin George Russell chuan pathumna a chuh thei a, mahse a tawp dawnah tihsual a neih avangin Sainz a pel thei lo.
Vawi sarih world champion Lewis Hamilton chuan lap 1 kawi hmasa berah Fernando Alonso a nek lutuk a, ama tihsual avangin car pahnih intai in boruakah a invawrh kang lawp. A car chhe lai a tam avangin a tlan zo thei lo ve thung.