- Reuben Lalnunthara Hnamte
Mithiamte chuan chhungkua hi khawvela engkim bul lo tanna a ni an ti thin a. School hmasa ber, damdawiin hmasa ber, sorkar te ber ti tein an lo sawi thin. Hei hi a dik hle in kei pawhin ka hria a. Kohhrante pawh hian Kristian chhungkua chung chang inzirtirna hi kan nei nasa a, a sawt pawh a sawt viau a, mahse chutih rualin chu lam lungkham lem lo, chhungkua aia ngaihpawimawh zawk nei Pa leh Nu te an la kat nawk tho mai a. Ram hruaitu tha, politician tha nei tur pawhin a pawimawh leh bultanna hmasa ber chu chhungkua a ni tlat a ni. Nu leh pa ten inchhungkhura kan thusawi leh tawngkam hnih khat hi keinin kan hriatreng tawh lem loh pawh kan fate hian an lo chhinchhiah hle thin.
Nu leh pa tam tak chu khawtlang, NGO leh political party ah te nihna chanvo tha tak tak chelha mi tul takte an ni thin a, an tangkai em em bawk. Chutih laiin chhungkaw lam kha a lo kawrawng viau thei tlat mai. Kevin miller, author leh editor ni bawk chuan a lehkhabu pakhatah tihian a thutlukna siam thu a sawi a. Kum tam tak kaltaah khan Kristian Pawl lian tak pakhat hian Board chairman ni turin min rawn sawm a. Keini ang duang tan chuan thil lawmawm tak a ni. Chu hna chu mi tam tak awh leh thawh chak, hlawh tha tak a ni a.Kan chhungkaw dinhmun pawh min chawikangin kan khawsak pawh a zangkhai phah ngeiin ka ring a.
Mahse, nupui fanau nei ka ni a, ka fate pawh enkawl ngai tak an la ni. Ka nupui ka rawn ta a. Ka nupui chuan nupui fanau tan tunah pawh hun ka nei tam lova, chu hna chu sangin duhawm hle mahse, zantina i phone call dawn turte, Inrinni leh chalwhnia i buai zia turte chhungkaw tani fate tana hun I neih loh dan turte kha ngaihtuah la, chu hna chu duhawmin awhawm viau mahse ti lo zawk mai rawh” tiin min duhpui ta lo a ni. Chutah Pathian ka rawn leh ta a, ka tawngtai a. Pathian chhanna chu tihian a lo thleng ta a ni. “I nupui fanaute hmangaih la, tha takin enkawl ang che” tih hi a ni a ti a ni. Kevina ang mi hi kan tam lo hlein a rinawm a, mi ngaihsanawm tak a ni. Keini chuan chhungkua lam ngaihtuah miah lovin, khawtlangah, pawlah leh kohhran thlengin nihna kan chuh zawk emaw tih tur a ni.
Nakum lawkah inthlanpui kan hmachhawn leh dawn a. Hmanlai kan pi leh pute khan nupui pasal innei turte chu an chhungkaw chanchin leh thlahtu lamte an lo inchhuiin an lo fimkhur thei hle mai. Hnam fing hmasa leh upa zawkte ngei pawh hian mi lar leh ropui tak takte, ram hruaitu te pawh hi an chhungkaw tobul (Family background) an lo chhui viau thin bawk. Keini pawh hian kan ram hruaitu atan hian kan thlan turah kan fimkhur hle a ngai a ni. Pawisa nei leh lehkhathiam sang deuh emaw, huhang ngah deuh ringawtte hi ram hruaitu atan an tha ber angem? tih te pawh hi kan ngaihtuah a pawimawh hle. Ram hruaitu tha turte, hruaitu tha turte hi a tobul chu chhungkua atangin a intan fo thin.
Fate puitling tawh leh, ngaihtuahawm an nih tawh loh hnuah chuan lo inhmang pawh ni ila thuhran a ni a. Chuti nilova, chhungkua enkawl hman lo lek a, fate tan pawh a hun nei thei lova, thildanga kan phibuai thin hi a pawiin a tha lo takzet a ni. III Johan 3:4 ah chuan “Ka fate thutaka an awm tih ka hriat a liama lawmna nasa zawk reng ka nei lo ve”a lo ti a. Kan faten Pathian thutak an zawm leh an awih tluka hlu hi khawvelah a awm lo. Lehkha thiamine, hausa hle mahse, an nun an hloh tawh chuan lawman tur reng a awm lo ve. Tunlaiah thalaite zingah ruihhlo a hluar em em ta mai a, an thlarau leh an nunna an chan hi ava pawi thin tak em! Kan fate tana hun kan pek tlem lutuk avangin kan fate hian thian an mamawh a, thian sual an kawp a, inchhung nuam an ti lova, sual kawng thuk takah an pil mek a ni.
Pawisa chu ngahin inleh lo thapui pui nei mah ila, chhungkua kan hlim loh chuan khawvel hi a nuam thei lo. Chhungkua hi i ngaipawimawh ang u.